Inhlanganiso yeFootballers Union of Zimbabwe ngeviki eledluleyo yamukele imvunulo esetshenziswa ngabesifazane nxa besemfuleni ivela kusomabhizimusi uNkosazana Sithulisiwe Mthimkhulu njalo iqondiswe kubadlali bomdlalo wenguqu abesifazane abadlalela amaqembu ako Bulawayo.
Isiphathamandla senhlanganiso ye
Footballers Union of Zimbabwe owake waba njalo ngukaputeni weqembu lama Mighty Warriors uNomsa Boyz Moyo, uthi isipho sika Mthimkhulu sizaphathisa kakhulu abadlali bomdlalo wenguqu abesifazane.
“Kungaba ngubani phandle lapha ofuna ukupha isipho ucabanga umntana ongumfana. Abantu basuka bakhohlwe ukuba umntwana oyinkazana laye kumele akhangelwe. Ngalokho ke ngithi uMaMthimkhulu inkosi kayimbusise ingezele kulokhu asiphe khona njengoba kuthiwa isandla esiphayo sibusisekile. Ngicela labanye omama abenza ibhizimusi ukuba baxhasane lomama uMaMthimkhulu bencedise abantwana ngalesisikhathi sikhangelane lomkhuhlane we Covid – 19. Mina ngimele abantwana abangamankazana abadlala umdlalo wenguqu ngithi siyabonga, balutshwane abangakwenza lokhu osenzele khona,” kutsho uMoyo.
Impahla lezi ezivela kuMaMthimkhulu ziye kumaqembu alitshumi lambili abalisa ele Barrow Jets, Biya and Friends, New Orleans, Highlanders Royals, Magwegwe, ZRP, Street Set, Mpopoma, Sobukhazi, Entumbane, Bantu kanye le Hearts of Oak.
UMaMthimkhulu utshele intathelizindaba zemidlalo ukuba isifiso sakhe ngesokuba inhlelo zokuphathisa abesifazane abadlala umdlalo wenguqu zisabalale zifinyelele kumagumbi amane elizwe le Zimbabwe njalo ukhuthaze abanye omama ukuba labo bephatheke kuzo.
Iqembu le Mighty Warriors yilo iqembu lakuqala elomdlalo wenguqu kwele Zimbabwe ukufinyelela ukuyadlala kumidlalo ye Olympics kodwa usekelo abadlali besifazane abalutholayo lunganeno nxa kuqathaniswa lolutholwa ngabadlali besilisa.