Abasola umbuso weZanu PF bathi ukubotshwa mahlayana kwamalunga amabandla aphikisayo kuveza sobala ukuthi uMongameli Emmerson Mnangagwa uzimisele ukugxilisa umbuso woncindezelo kulokuthi ahloniphe amalungelo oluntu lentando kazulu.
Wathi engena embusweni ngomnyaka ka2017 ngemva kokugenqulwa kukamuyi uRobert Mugabe libutho, uMnangagwa wathembisa ukuba ngumbusi olalelayo njalo ohlonipha intando yabanengi, i-democracy, esithi ilizwi labantu lilizwi likaNkulunkulu.
Wakuveza sobala ukuthi wayejonge ukuzehlukanisa loMugabe, yena owayesaziwa ngodlakela kumabandla aphikisayo labalwela amalungelo oluntu.
Kodwa abanye bathi ukubotshwa mahlayana kwabantu abagoqela osaphethe isikhundla somkhokheli welinye lamacele eCitizens Coalition for Change uMnu. Jameson Timba lamalunga ebandla lakhe angamatshumi phose ayisitshiyangalombili, 78, kukhomba ukuthi uMnangagwa loMugabe zimbila zantabanye.
UTimba labanye bakhe sebefikisa inyanga egcweleyo bevalelwe entilongweni ngemva kokubotshwa besendlini kaTimba benanza usuku lweDay of the African Child ngenyanga edluleyo, besetheswa icala lokuqoqa udlakela - okulicala abalilandulayo.
Ingcwethi kwezombusazwe esebenza kunhlanganiso yeZimbabwe Democracy Institute uMnu. Bekezela Gumbo uthi ukungenela kwebutho kundaba zombusazwe yikho okwenza uhulumende kaMnangagwa eqhubeke ngokwethusela abantu lokubahlukuluza.
"Indlela abebutho abaziphethe ngayo kunhlangothi zonke zelizwe kwenza ukuba umbuso wentando kazulu ube nzima kwele Zimbabwe ngoba befuna ukuba kube yibo bodwa abazibambileyo.’’
Amazwi kaGumbo agcizelelwe liqgwetha elilwela amalungelo oluntu uMnu. David Maseko yena othi uhulumende usebenzisa imithetho efana loweMantainance of Peace and Order Act ukuvimba imihlangano yabamabandla aphikisayo lenkululeko kazulu.
"Ukusetshenziswa kwemithetho leyi kwenza kube nzima ukuba abantu behlangane bexoxe ngalokho okubakhathazayo. Sekunzima ukuba uzulu asebenzise amalungelo akhe."
Olwela amalungelo oluntu uMnu. Charles Nyoni, owasebenza kakhulu loMnu Itai Dzamara, owathunjwa wanyamalala kokuphela ngesikhathi sikaMugabe, uthi indlela uhulumende aqina ngayo ukuthi kwethulwe umthetho olawula ukusebenza kwenhlanganiso ezizimeleyo owePrivate Voluntary Organizations Bill itshengisa ukuba ufuna ukwephula amalungelo abantu.
"Ukubekwa kwemthetho efana labo PVO wona osukusibanga saphezulu ephalamende kuveza obala ukuba kuzakuba kunzima ukuba uzulu we Zimbabwe akhululeke."
Ingcitshi kwezombusazwe esebenza eUniversity of Zimbabwe uMnu. John Dube uthi uhulumende kaMnangagwa walisa abantu ukutshengisela emigwaqweni ngoba wesaba ukuthi bangamvukela ngezizatho ezitshiyeneyo ezigoqela ukudilika komnotho.
"Kunzima ukuba kube lendlela ezikhululeileyo zokuba uhulumende avumele abantu batsho okusenhliziyweni zabo ngoba esesaba ukuba bazatshengisela."
UNkosikazi Nomalanga Ncube, ohlaziya ezombusazwe esebenza lenhlanganiso yeAccountability Lab, laye ulombono ofanayo.
"Sibone uhulumende esalisa abantu ukuba babuthane, lokhu ngenye indlela etsho ukuba akula kukhululeka kuleli."
Kodwa abebandla leZANU PF bathi umbuso kaMnangagwa uhlonipha intando kazulu. Omunye wabo nguMnu. Mabutho Moyo okuCentral Committee yalelibandla.
"Uhulumende we ZANU PF wenza ukuba amalungelo oluntu ahlonitshwe. Yithi sodwa esenza ukuba kukhululeke kodwa bona abakubona bayatshinga kuphela kodwa kukhululekile kwele Zimbabwe."
Osebenza kugatsha lukahulumende lwezokukhitshwa kwemibiko uMnu. Richard Mahomva uvumelane loMoyo.
"Uhulumende we mZimbabwe ulandela amalungelo oluntu. Akula muntu ohlukunyezwayo abehluleka ukulandela umthetho bakwenza ukuba ibizo lethu ligcole kodwa isimo sihle elizweni."
Inhlanganiso ekhankasela amalungelo oluntu emhlabeni jikelele eyeHuman Rights Watch ithi abakhokheli beSouthern African Development Community, ISADC, kumele bakhuze uhulumende kaMnangagwa phezu kokwephula amalungelo oluntu. Ithi ukukhahlanyezwa kukazulu sokufike kuzinga elibi phambilini komhlangano walumanyano ozaqhutshelwa eHarare mhlaka 17 ngoNcwabakazi.
UMnangagwa uthi abamabandla aphikisayo bayabotshwa ngoba beqoqa udlakela ngesikhathi somhlangano weSADC lo.
UMnangagwa usanda kwazisa ukuthi uzasuka embusweni ngo2028 lapho azaphutsha khona amahlandla akhe amabili okubusa avunyelwa yisisekelo sombuso welizwe, i-constitution.
Kodwa abanye bathi abathembi ukuthi uqinisile ngoba ekhanya elesifiso sokuqhelisa umbuso wakhe.
Forum