Umlobi odumileyo wengwalo zesiNdebele uMnu Bernard Dima Ndlovu, obhubhe ngempelaviki uzangcwatshwa ngoLwesithathu.
Abemuli yakhe bathi uNdlovu uvuke efile ngoMgqibelo engazange agule.
UNdlovu waloba ingwalo ezilitshumi lasikhombisa ezigoqela ezike zafundiswa ezikolo.
Ezinye zalezi ngwalo ezidumileyo ngezithi “Umzilakawulandelwa,” “Akulanga Laphuma Elinye Lingakatshoni,” “Umvuzo Wezinyembezi” lezinye ezinengi.
UNdlovu ubesebenzela inkampani elungisa amathaya, iDunlop. Ubeseleminyaka yokuzalwa engamatshumi amahlanu lanhlanu.
UNdlovu utshiye umkakhe labantwana abayisithupha. Uzabekwa emzini wakhe eNyamandlovu.
Umlobi othi ubeloNdlovu eziphilele ngoLwesihlanu uMnu Isaac Mpofu utshele iStudio 7 ukuthi eleZimbabwe lilahlekelwe ngumlobi obeloba ngobuciko bezinga eliphezulu.