Uhulumende weZimbabwe useyethule umbiko oveza ukuyekethiswa kweziqondiso zomthetho ophathelane labamabhizimusi bakwamanye amazwe abadinga ukuzosungula umsebenzi elizweni owe Indigenization.
Umpathintambo wendaba zabatsha lokusungulwa kwamabhizimusi, umnumzana Patrick Zhuwao utshele umhlangano lentathelizindaba ngoMvulo eHarare ukuba iziqondiso lezi ziguqulwe, ukuze kuhambelane lohlelo lokuthuthukisa inotho yelizwe olwe Zimbabwe Agenda for Social and Economic Transformation –ZIMASSET.
Phansi kwalezi ziqondiso abaninibhizimusi abakwamanye amazwe kabasabanjwa ngamandla ukupha izizalwane zeZimbabwe amashares ayisilinganiso esedlula inxenye yekhulu-51% njengakuqala.
Ingcwethi ezicubungula ezomnotho ziyalisekela leli nyathelo, ezigoqela uMnumzana Rejoice Ngwenya othi liyabukeka ngempela ngoba lijonge ukuthuthukisa ukusungulwa kwamabhizimusi ngabakwamanye amazwe.
UNgwenya uthi, "Kuyabukeka lokhu okwenziwa nguMnu. Patrick Chinamasa umphathintambo wezemali ngenxa yokuthi yikho okufunwa ngosomabhizimusi bakwamanye amazwe.
"Okukhubayo kuphela yikuthi uZhuwao ungani kazilutho ngohlelo lolu. Ukhuluma izinto ezingelamnkantsho ngakho-ke ngibona engani kumele lumiswe uhlelo lolu."
Ele Zimbabwe lethula iziqondiso zakuqala zomthetho lo ngomnyaka ka2011.