Umbukiso weZimbabwe International Trade Fair oqale ngoLwesibili uvulwe okusemthethweni ngumongameli Emmerson Mnangagwa Ngolwesine ethi amakhampani kumele aphakame asebenzise amaqhinga alakho ukumelana lomumo okhona weCOVID-19.
Umongameli wengeze ethi eleZimbabwe selinanzelelwa libhanga elikhulu eleWorld Bank njengelinye lamazwe asephakeme njalo ekhokhela ngokukhula emazweni eAfrica. Uthe njalo ezomnotho welizwe kukhangelelwe ukuthi zizakhwela ukwedlula lokhuobekukhangelelwe lonyaka.
Umongameli Mnangagwa wengeze ethi uhulumende wakhe kathandabuzi ukulandela imthetho efaka eleZimbabwe ezingeni lamazwe ahuga amabhizimusi ukuze kuthuthukiswe ezomnotho.
“I Zimbabwe isikhethwe njengelinye lelizwe elilomnotho othuthukayo esigabeni sethu kanye lekuqhubeni ezamabhizimusi lamanye amazwe. Njalo ngiyathokoza ukuthi ngithi lokhu obekukhangelelwe ngomnyaka ka 2021 kwezomnotho sesenze okuhle okudlula lapho. Ingqubekela phambili leyi singathi ilethwe yikusebenzelana ndawonye kukahulumende, labosomabhizimusi kanye lozulu wonke weZimbabwe.”
Umphathintambo wezamabhizimusi unkosikazi Sekai Nzenza, uthe amakhampani abukisayo atshengisa ukuthuthuka lokumelana lesimo somnotho.
“IZITF yindawo yokubukisa lokhu amaZimbabwe akwenzayo okusuka kubonise abanye esikwenzayo ngokukhalipha kwethu. AmaNkampani akhonapha elizweni atshengisa ubuciko obukhulu kanye lokwamukela isinqumo selizwe esokuthengiselana lamanye amazwe.”
Umnumzana Everton Mlawuzi usomabhizimuzi koBulawayo uthi indlela zakulezi insuku ezebulenjini ziyadula kakhulu ukuthi bazisebenzise ekuqhubeni amabhizimuzi.
“Yebokambe linyathela elihle leli, njalo ngumcabango omuhle ukuthi abantu basebenzise indlela zakulezinsuku ezokusakaza lezokubonakalisa impahla zabo abazithengisayo. Kodwa singakhangela into eseseyingnxaki yikuthi lezizinto zakulezinsuku ezifana labo Facebook, laboWhatApp, intengo yakhona isangani iphezulu. Ngaphandle kuphela nxa laba abayibo abanikazi bamagagasi bengehlisa intengo yabo, kumbe benze wonkumuntu anelise ukuthi efinyelele amaDigital platforms lawa, kuzakuba linyathela elihle njalo kuzakuba lampumela enhle sibili. Kodwa nxa kungazange kwenzakale, lumcabango uzahlala ulilphupho.”
Umbukiso walonyaka wenziwa phansi kwendikimba ethi “Showcasing the New Normal For Business and Industry: Realities and Opportunities”
Lonyaka kubikwa kulamazwe alitshumi lanye athe azaphatheka embukisweni lo. Amazwe la agoqela eleBotswana, South Africa, DRC, Belarus, Malawi, Mauritius Namibia, Kenya, Indonesia, Nigeria lele Tanzania. Amakampani abukisayo aweZimbabwe wona aphose abengamakhulu amane (396).