UTrump Usola uObama loBiden Phezu Kwengozi Yendizamtshina Ebulalise Abantu Abangu-67

UMongameli weMelika uMnu Donald Trump usechothoze abake baba ngabaholi balelilizwe uMnu Joe Biden loBarack Obama esithi yibo abasungula inhlelo zokuqhatsha abantu abangazi umsebenzi, khona athi yikho okudale ingozi yendizamtshina ebulalise abantu abangamatshumi phose ayisikhombisa, 67.

Indizamtshina ethwala umphakathi eyenkampani yeAmerican Arlines ingqikilane le-helicopter yebutho emoyeni duzane legceke leRonald Reagan National Airport, eWashington DC, ebusuku ngoLwesithathu.

Lanxa engaphanga ubufakazi, uTrump uthe ngenhlelo zabo zokufuna ukulinganisa amathuba emuntwini wonke, ohulumende bakaObama loBiden baqhatsha abantu abehluleka umsebenzi babafaka ezikhundleni ezigoqela ezokusebenza emagcekeni endizamtshina.

Abahlengi bathi indizamtshina zombili zihle zawela emfuleni omkhulu ohlala ugcwele, uPotomac, wona olamanzi ayizigaqa ngenxa yamakhaza.

Bathi njalo akekho osindileyo.

Indizamtshina yeAmerican Airlines ibisizahlala eRonald Regan Airport ithwele abantu abangamatshumi ayisithupha lane, 64, ivela edolobheni leWichita, eKansas.

I-helicopter yona ibithwele amabutho amathathu akade evivinywa.

Abahlengi bathi sebethole izidumbu ezingamatshumi amathathu, 30, njalo basathungatha ezinye kulumfula.

Isizalwane seZimbabwe esihlala eWashington DC uNkosazana Sikhululekile Bhoboza Sibanda utshele iStudio 7 ukuthi abantu abanengi baphatheke kabi ngalingozi.

Embed share

Ingxoxo loNkosazana Sikhululekile Bhoboza Sibanda

by VOA

Embed share

The code has been copied to your clipboard.

The URL has been copied to your clipboard

---

No media source currently available

0:00 0:02:18 0:00

Lapho esitholakala khona

• 16 kbps | MP3
• 32 kbps | MP3
• 48 kbps | MP3

Ukudlala