UMongameli Donald Trump ukhangelelwe ukuba namuhla kusihlwa uzakhuluma ngokutshiyeneyo edale leCongress phambi kwamalunga eHouse of Representatives lawe Senate ngesikhathi kulabanye abathakazelela akwenzayo kube labanye njalo abachothoza umsebenzi wakhe besithi ubhidliza inhlangothi ezinengi zikahulumende.
UTrump ukhangelelwe ukuba uzaveza inhlelo zakhe zokuthuthukisa umnotho, ezokuphungula inani lezisebenzi zikahulumende, ukumisa impi ephakathi kweleUkraine leleRussia, ezabantu bokuza, intengo yempahla, ukugugudeka komnotho lokunye.
Uzakwenza lokhu kulamanye amalunga edale leSenate leleHouse of Representatives abakubandla lakhe asebethwaliswe nzima ngabantu ababameleyo abakhala ngokugunyulwa kwezisebenzi zikahulumende lokumiswa kwenhlelo zikazulu.
Okwamanje uhulumende wakhe ulungiselela ukwethula uluhlu lwendleko zikahulumende, ukubhadala izikwelede zelizwe lokwehlisa imithelo yezinothi.
Abaphikisayo abakubandla leDemocratic Party bathi uTrump wenza okungaqondanga ngakho-ke kumele zivinjwe zonke inhlelo zakhe.
Ukuhlaziya loludaba sixoxe loMnu. Raphael Mthombeni, odabuka eZimbabwe ohlala eTexas, othi kunengi okuzakhulunywa nguTrump okulakho ukuchothozwa ngabaphikisayo.
Forum