Abancintisa kukhetho lokudinga umongameli weleMelika uMnu Joe Biden loMnu Donald Trump badibane kungxoxo mpikiswano eqoqwe ngumsakazo weCNN khonapha eMelika izolo kusihlwa lapho ababili laba abaphoselane amazwi aqatha bechothozana ngasebakwenzela uzulu labazakwenza bengakhethwa ngabantu ngoLwezi lonyaka.
Ababili laba bakhulume ngendaba eziqakathekileyo kuzizalwane zeMelika, okuzindaba ezilakho ukuphathisa imikhankaso yabo yokhetho oluzayo. Eyinye yendaba lezi ngeyomnotho lokukhuphuka kwentengo yempahla. UTrump uhlasele uBiden ngodaba lolu.
"Wathola kungela kukhwela kwentengo, kwahlala kunjalo okwenyanga ezilitshumi lane, kodwa intengo yempahla yaqala ukukhwela okumangalisayo ngoba basebenzisa imali angathi ngabantu abangazi abakwenzayo, vele abazi ukuthi benzani, nguye umongameli owehluleke ukwedlula bonke."
UBiden yena uthe uTrump nguye owatshiya ebhidlize umnotho welizwe.
"Ngesikhathi sakhe wayekethisa kwabanothileyo kuphela, wabakhiphela imithelo eminengi kakhulu okungakaze kwenzakale eMelika, imithelo le yafika ku $2 trillion. Ngesikhathi sakhe abantu abanengi balahlekelwa yimisebenzi, inani labangela misebenzi lengezelela kakhulu."
Olunye udaba okukhulunywe ngalo ngolukahulumende wentando kazulu eMelika kulandela ukuhlaselwa kwesigodlo seCongress eseCapitol Hill ngabasekeli baka Trump bephikisana lempumela yokhetho lomnyaka ka2021. Ebuzwa ngokuthi uzakwamukela na impumela yokhetho nxa enganqotshwa, uTrump kaphendulanga lumbuzo, waze waphindwa njalo wasephendula esithi.
"Nxa uhlelo luqhutshwe kuhle kulandelwa umthetho ngingamukela impumela. Kodwa inkohlakalo, ukutshontshwa kokhetho lokunye okunengi nengi yikho okwangenza ngaphikisa okwaphuma kukhetho olwedluleyo. Nxa kungaqhubeka kunjalo ngingahle ngikhulume lentathelizindaba kungakedluli iviki."
UBiden kuloludaba uthe uTrump uvele ngumuntu ongafuni ukuvuma ukunqotshwa.
"Imithethwandaba yonke yathi konke owakutshoyo akusilo qiniso kodwa uqhubekela phambili ukhuluma amanga la awokuthi ukhetho lwatshontshwa, akula bufakazi bakho konke lokho, kodwa angiboni ukuvuma lokhu ngoba wejayele ukukhonona kuphela. Awuvumi vele ukunqotshwa."
Olandela ezombusazwe zeMelika njalo eyisizalwane seZimbabwe, uMnu Den Moyo, uthi uBiden uyitshaye ekhaleni esithi uTrump ubengaphenduli imibuzo.
Esinye isizalwane seZimbabwe esihlala eMelika, uMnu Thabang Nare, uthi uBiden akasela mandla okuyikho okulakho ukuphazamisa umkhankaso wakhe.
UMnu. Tim Muringai olandela ezombusazwe njalo ehlala eMelika uthi okudanisayo yikuthi bobabili sebeluphele.
Abezindaba abeRueters babika ukuthi abavoti abayisilinganiso sokuhlanu ekhulwini, i-5% abakakhethi ukuthi bazavotela bani, njalo balakho ukuvotela ozangena kukhetho engowesithathu kumbe ukungavoti.
UTrump loBiden bakhangelelwe ukuhlangana njalo kungxoxo-mpikiswano yesibili eyokucina ngoMpandula. Ukhetho lukaMongameli weMelika luzaqhutshwa ngoLwezi lonyaka.
Forum