UMnu. Tim Walz wakhethwa kabili ukuba ngusibalukhulu wesabele seMinnesota engakakhethwa nguNkosikazi Kamala Harris ukuthi abengumsekeli wakhe.
Ngesikhathi ekhankasela ukhetho oluzayo, ukhuluma kakhulu ngokukhula kwakhe eNebraska okwenza waba yilokhu ayikho khona namuhla.
UWalz, umsekeli kaNkosikazi Harris kukhetho oluzayo, wakhulela emaphandleni eNebraska. Indawo le ingumango ongaba ngamahola amahlanu okuya emagcekeni endizamtshina aseduze. Lapha kugcwele iziphala. Abantu balapha bazibona beyingxenye yakhe.
UBecky Potmesil ulepulazi duzane leAlliance eNebraska.
“Uma ngimbona kumabonakude akutsho lakancane ukuba ngibona umuntu wezombusazwe. Ungikhumbuza umbalisi wami esikolo ngoba
UWalz wazalelwa eWest Point, eNebraska, wakhulela eValentine okulabantu abedlula kancane inkulungwane ezimbili lengxenye – 2,600 abangaziwa kakhulu ngezombusazwe.
Isakhamuzi seValentine uMnu. Tom Elliot uyayazi imuli kaWalz.
“Sasilandela imisebenzi kaTim sikhatshana. Lokhu sasingakulindelanga.”
Uyise wathi esanda kutholakala elesifo semvukuzane yamaphaphu, imuli yakhe yasuka kuleyo ndawo yayahlala enyakatho okungumango oyisilinganiso samakiloimeters alikhulu lamatshumi ayisithupha – 160 kilometers ukuze behlale duzane lomdeni wabo.
UWalz uthi, “Ngakhulela eButte eNebraska idolobho elalilabantu abangamakhulu amane – 400. Ngangilabantwana abangamatshumi amabili lane – 24 engangibafundisa esikolweni semfundo yaphezulu.”
Umdeni kaWalz uyamkhumbula. Umalumakhe uMnu. Jerome Reinman owayengumlini uthi uzavotela umzukulu wakhe loba engalaqiniso lokuthi uzazimela inhlupho zomhlaba njengoba wakhulela edolobheni elincane njalo engumuntu olesisa kakhulu.
“Wayengumntwana njengabanye abantwana. Waye Lungile, ethanda ezemidlalo. UTim kasoze ajamelana kakhulu loPutin. Kuyangethusa.”
UWalz owakhulela emaphandleni njalo owayethanda ukuthiya inhlanzi lokuzingela, wayethanda imibhobho lezembatho ezifana lezebutho. Wayelengwane ethakazelelwa okwamanje ngabebandla lamaDemocrats.
UBarbara Critchett wezenzela kanye lendodaba yakhe amakawuso ahambelanayo elemifanekiso kaHarris loWalz alembala webutho. “Umbala wecamourflage, kuveza impilo yeNebraska yokuthanda ukuzingela. Ngibona njalo. Sesikwenzela yena lokhu lomunye wakhe.”
UWalz walandela okwenziwa nguyise owalwa impi yakweleKorea. Wangena kubutho kuviyo leNational Guard eleminyaka yokuzalwa elitshumi lasikhombisa – 17, wahlala kubutho okweminyaka engamatshumi amabili lane – 24.
Kodwa kulabanye abangaboni solinye ngembali kaWalz eyebutho lokuthanda imibhobho.
UMnu. Steven Hale yisikhamuzi seValentine.
“Akekho eduze. Ulamanga. Umthetho weSecond Amendment kabasoze bemthethwele izikhali njengalokhu abafuna ukukwenza kithi.”
UWalz usekela ukukhutshwa kwezisu okwenza ukuba engathakazelelwa ngabantu eNebraska okulezindlu zokusonta ezilezikhumbuzo zabantwana abangakazalwa njalo indawo le igcwele amaphetshana aveza ukuba kabafuni kuzwa ngitsho lakancane ngodaba lokukhupha izisu.
Lokhu kusekelwa nguMnu. Michael Wartmen ohlala eWest Point.
“Lolu ludaba oluqakatheke kakhulu empilweni yami ngoba ngisekela impilo. Umuntu osekela impilo ngumuntu engizamvotela. Kasoxe ethole ivoti lami.”
UWalz wathola isicoco sakhe ekolitshini leChadron State College lapho uTrump othakazelelwa khona ngabantu abanengi. Abaphathi bekolotshi leli basanda kwethula ifulegi yakhe kulandela ukuphanyekwa kwayo duzane lefulegi yeMelika ekolitshini leli.
Isakhamuzi seChadron uMnu. Miles Bannan uthi ukuzalwa kuka Walz kulindawo akutsho ukuba bayamsekela.
“Kulemuli ezinengi ezingathandi ukukhuluma ngezombusazwe ngoba kulokuphikisana okunengi. Ngibona engani kulabanye abathakazelela akwenzayo kodwa akusoze kuguqule indlela abavota ngayo.”
Abanye bathi uWalz uzanika abantu beNebraska okuyisikhatshana kodumo kodwa endaweni le akutho ukuba ukukhulela kuyo kuzamlethela amavoti.
Forum