Uhambo lukasomabhizimusi wakwele Nigerai, uMnu. Alikote Dangote, oume ngokuba ngomunye wabantu abanothe okwamagama, sekulethe ithemba elizweni kulandela imbiko ethi wethekelela ele Zimbabwe ukuzosungula amabhizimusi elizweni lelo.
UDangote, osefake izigidi ezingangamakhulu amane, $400 million, kubhizimusi lokulungisa isamende kwele Zambia, uhlangane leziphathamandla zikahulumende kunye loMongameli Robert Mugabe.
Ngemva komhlangano wakhe loMugabe, uDangote uthe ufuna ukungena kubhizimusi kwezesamande amandla kagetsi kunye lokwemba amalahle.
Ingcwethi kwezomnotho welizwe, uMnu. Prosper Chitambara uthi inyathelo elithethwe ngu Dangote lihle ngoba lizakhuthaza abanye osomabhizimusi abavela kwamanye amazwe ukuthi labo bazosungula amabhizimusi eZimbabwe.
Enye njalo ingcwethi kwezomnotho, uMnu. Masimba Kuchera utshele iStudio Seven ukuthi kumele uhulumende ayamukele ngezandla zombili osomabhizimusi abanjengo Dangote ngoba bengasungula amabhizimusi alakho ukudala imisebenzi eminengi.
Kolunye udaba oluphathelane lezomnotho welizwe esilethulela zona ngoLwesibili maviki-wonke, sixoxa loMnu. Okay Ndlovu weNqameni eGwanda, owayengumlweli wempi yenkululeko ekuvuyo leZIPRA, yena osilobele incwadi esichasisela ngobunzima abhekana labo empilweni kusukela evela empini kuze kube lamuhla ezama ukuziphilisa kanye lemuli yakhe.
UMnu. Ndlovu uthi imali ayeyigcinile esasebenza enguSayijeni kubutho lesizwe ilizwe selithole uzibuse yawa amandla ebhanga ezama ukuthi ayizalise imncede kusasa.
Wengezelele wathi waqalisa ukuba lemuli esevele esemdala ngoba wayesempini, okwabangela ukuthi abelabantwana abalokhu befunda lamuhla yena engasasebenzi.