Abenhlanganiso yemisakazo yezigaba ama Community Radio Stations -ZACRAS bathi bakhathazekile ngomcabango kahulumende wokufuna ukuke ame ukupha amalicence okusebenza kweminye imisakazo ngoba umumo womnotho ungamanga kuhle, ngakhoke sebedinga ukukhulumisana lohulumende ukuze bazwisise ngaloludaba.
Obona ngemisebenzi ku ZACRAS umnumzana Kudzai Kwangwari uthi lumcabango uza ngesikhathi bekhangelele ukwengezwa kwenani labaphiwa amalicence amaCommunity Radio njalo ukuncitshwa kwabo yikwephula umthetho:
Umthetho weBroadcasting Services Act usuleminyaka elitshumi lanhlanu ukhona njalo uvumeza ukuba imisakazo yezigaba ibekhona kodwa kuze kube lalamhlanje lokhu akukenzakali.
Umqondisi we ZACRAS uNkosazana Vivian Marava uthi kuyadanisa kakhulu ukuzwa uhulumende esedonda ngemva kokunikeza ithemba lokuba imisakazo le izanikezwa amalicense.
Uthi inhlanganiso ezifana leyakhe, i-Misa Zimbabwe, Media Alliance lezinye zazama ukubuzisisa ngesikhathi uhulumende enikeza ama license emisakazo emikhulu yama Commercial Radio Stations, ukuba wasebenzisa iphi indlela ukuwakhetha ngoba kukhanya enikeze engahlolisisanga ukuba bengenelisa ukusebenza na?
Okhokhela inhlanganiso ezimeleyo eyeCOMALISO umnumzana Rejoice Ngwenya uthi ama Community Radio aqakatheke kakhulu lakunhlanganiso ezifana leyakhe ezilembiko enikeza uzulu imfundiso.
UMarava uthi I ZACRAS isizazama ukukhulumisana lohulumende ukuze ezwisise ukuba njengama Community Radio bami ngaphi kuloludaba.
Abe ZACRAS bathi uhulumende kumele aphe abantu amaLicense engatshoni ezihlupha ngokunye ngoba oyabe engasoke enelise ukuyisebenzisa ezaphuma kunikeze ithuba komunye.
Isigaba 61 le 62 sesisekelo sombuso sinikeza ilungelo lokuthola imbiko kunye lokuvulwa kwemisakazo. Uhulumende wathembisa ukuba uzanikeza imisakazo yezigaba imvumo kulandela ukusungulwa kohlelo lweDigitalization. Okwamanje kulemisakazo engaba ngamatshumi amabili egoqela iRadio Dialogue, Community Radio Harare, Getshenge FM leminye elokhe imele imvumo yokusebenza.
