Uhulumende waseMelika uthi eleZimbawe ngelinye lamazwe ayehluleka ukuthatha amanyathelo aqinileyo okulwisana lokuchatshiswa kwabantu imingcele yizigilamkhuba ezibathembisa imisebenzi kodwa zifike zibagqilaze zibenzisa imisebenzi emibi efana lokuthengisa ucansi, i-human trafficking.
Lokhu kuphume kugwalo lwalonyaka oluhlaziya isimo sokugqilazwa kwabantu emhlabeni jikelele olwethulwe izolo ngunobhala obona ngobudlelwano beMelika lamanye amazwe uMnu Antony Blinken phansi kwesihloko esithi, ‘2024 Trafficking in Persons Report.’
Lolugwalo luthi imizamo enziwa yiZimbabwe ukulwisana laloludubo ayaneli.
Luthi njalo izizalwane zeZimbabwe ezinengi ezisuka ekhaya zibalekela ukonakala komnotho ziyagqilazwa ngokusetshenziswa emasimini, emigodini egebha amatshe aligugu kanye lokuthengisa imizimba emazweni afana leSouth Africa, Iraq, Kenya, Kuwait, Oman, Saudi Arabia, China laseUganda.
Luthi njalo ngitsho laphakathi eZimbawe abesifazana labantwana bayagqilazwa ngendlela ezitshiyeneyo. Ngokunjalo, uhulumende weMelika uthi eleZimbabwe kumele liqinise imithetho yokujezisa izigilamkhuba ezigqilaza abantu laba.
Sixoxe lesiphathamandla senhlanganiso emela izizalwane zeZimbabwe lezakwamanye amazwe kweleSouth Africa eyeAfrican Diaspora Forum, uMnu Vusumuzi Sibanda, othi ngempela kukhona ukugqilazwa kwabeZimbabwe eSouth Africa.
Unobhala kugatsha olubona ngobudlelwano beZimbabwe amanye amazwe olwe-foreign affairs uMnu Simon Masanga kaphendulanga imibuzo esimthumele yona.
Forum