Unkosikazi Grace MugabengoMvulo ukhuthaze umkakhe uMongameli Mugabe ukuthi axotshe umsekeli wakhe, uNkosikazi Joice Mujuru emethesa icala lokufuna ukumsusa esihlalweni okungekho emthethweni.
Unkosikazi Mugabe wethule la mazwi epulazini lakhe leMazoe lapha ahlangane khona lezifundi ezivela kundawana zonke zelizwe. UNkosikazi Mugabe uthe kulandela udaba oluphume kuphephandaba le The Sunday Mail olokuthi uNkosikazi Mujuru wayefuna ukubulala uMongameli Mugabe bukhona njalo obunye ubufakazi bukamabonakude.
UNkosikazi Mugabe uphinde wathi uNkosikazi Mujuru selokhu wakhethwa ukuba ngumsekeli kaMongameli akulalutho olubambekayo aseke walwenza.
Omunye umkhokheli wezifundi, uMnu. Leopold Chakanyuka wazise lumbuthano ukuthi bafuna ukukhuthaza umongameli Mugabe ukuthi axotshe umphathintambo wezemfundo yaphezulu, uNkosikazi Olivia Muchena lomphathintambo wezabatsha, uMnu. Francis Nhema ukuthi kumele ababili laba batshiye izikhundla.
Ukuhlaziya loludaba uChris Gande weStudio Seven uxoxe lengcwethi ecubungula ezombusazwe, uMnu. George Mkhwananzi ukuze sizse imbono yakhe ngaloludaba.