Umkamongameli welizwe, unkosikazi Grace Mugabe, uthembise uzulu ukuba uzaluqeda udubo lokungezwani ebandleni leZanu PF. Lokhu ukutsho ekuqhubekeleni phambili kwemihlangano yakhe yokukhankasela ukuba akhethwe ukukhokhela uhlangothi lwabesifazane elizweni lonke.
Inkulungwane zabalandeli beZanu PF zibuthane eCity Sports Centre eHarare ngoLwesithathu emhlanganweni kaNkosikazi Grace Mugabe, wokuhlangana lozulu owe “Meet the People” emihlanganweni ayenza ezigabeni zonke zelizwe ngaphambilini komhlangano weCongress, ozakwenziwa ekupheleni kwawonalo umnyaka ngenyanga ka Mpalakazi.
Kunsukwana ezisanda kwedlula, unkosikazi Mugabe ukhethwe luhlangothi lwabesifazane ukuba abe ngunobhala jikelele walo, okuyisikhundla esimvumela ukuba angene laye kuPolitiburo, idale laphezulu elilamandla wokunquma okulandelwa libandla leZanu PF.
UGrace Mugabe ungena kwezombusazwe ngesikhathi sekulodubo lokungezwani lokufuthelana ebandleni leZanu PF phezu kokuba ngubani okuzamele athathe isikhundla sika mongameli Robert Mugabe nxa esengasekho.
Akazange esamotsha isikhathi unkosikazi Mugabe ngesikhathi eqala ukhulumisana lozulu, wahle waqala ngokukhuthaza amaqembu akuZanu Pf la alokungezwani ukuba amanyane.
Ubize umgcinisihlalo webandla e Harare umnumzana Amos Midzi kanye lokhokhela uhlangothi lwabontanga esigabeni sinye uMnu. Godfrey Gomwe, wabancenga phakathi kwabantu, ukuba bakhumisane umlotha balungisise lokho okubangele udlakela eMbare kunsukwana ezisanda kwedlula.
Unkosikazi Mugabe uthi udaba lokungezwani ebandleni lubangelwa ngamanye amalunga alezikhundla eziphezulu, wengeza ethi useyitholile imibiko ethi bakhona abanye kodwa engababethanga ngamagama, ababuthanise abantu ukuba batshengisele bekhonona ngokukhethwa kwakhe. Utshele umbuthano munye ukuba amanye am,amabhakana abekade eze lalaba bantu athethwe ngabezomthetho abakade belondoloza ukuthula kulomhlangano.
Kusenjalo,osaphethe isikhundla sokuba ngunobhala jikelele ebandleni le Zanu Pf,unkosikazi Oppah Muchinguri, obhoda lomkamongameli kule mikhankaso, uthi unkosikazi Mugabe ngumuntu omanyanisa abantu ebandleni lakhe. Uthi uMuchinguri, umka mongameli uzinikele ukuluqeda udubo lokungezwani kubandla elibusayo.
Ibandla le Zanu PF, libikwa lihlephuke laba yizihlephu azimbili, ezibangisana ukuthatha isikhundla sika Mugabe.
Elinye lalamaqembu libikwa likhokhelwa ngumsekeli kamongameli unkosikazi Joice Mujuru kuthi elinye likhokhelwa ngumphathintambo wezemithetho umnumzana Emmerson Mnangagwa. Kodwa,zombili inkokheli ziyakulandula zisithi ziyamhlonipha njalo zithembisa ukumsekela uMugabe.
Umkamongameli uthethe lelithuba ukuchothoza ibandla eliphikisayo le MDC elikhokhelwa ngumnumzana Morgan Tsvangirayi, ethi ngoba yilo eliqhuba imisebenzi yokubhidliza izakhiwo zalabo abakha imizi yabo endaweni ezingavunyelwayo esigodlweni.
Esekhuluma ngodaba lokutrshengisela okuqoqwa ngelinye lamacele ebandla leMDC T, elikhokhelwa ngumnumzana Morgan Tsvangirai, unkosikazi Mugabe, uthi uyazi ukuba uzulu akajabuliswa yisimo somnotho elizweni, wakhuthaza labo abakuhulumende ukuba bazigcwalise izithembiso abazenza ngesikhathi bekhankasela kukhetho lwanyakenye.
Kodwa uzulu okhulumisane leStudio Seven phezu kwesicelo sikamka mongameli phezu kokuxolelana,okubalisa umnuzana Sicelo Gwebu,uthi lokhu yikukhulumanje kwalumama okubamba abantu amehlo, ukuze kubonakale ingani uyalicitsha lelo langabi lomlilo eselisebandleni lakhe. Uthi uGwebu, lanxa kuyimizamo encomekayo ,leyo ezanywa ngunkosikazi Mugabe, ukumanyanisa amaqembu angezwaniyo, umumo ebandleni leli awusalungiseki.
Unkosikazi Mugabe ukhangelelwe ukungena imihlangano efanayo esigabeni se Masvingo le Manicaland,okuyingxenye yohlelo lwakhe lokuhlangana lozulu ilizwe lonke, ukuze atholiswe isikhundla sokukhokhela uhlangothi lwabesifazane.