Intathelizindaba ebilodumo obengumqeqetshi wentathelizindaba, ekolitshini leHarare Polytechnic, uPeter Banga, ubekiwe NgoLwesithathu, ekhaya lapho abedabuka khona eWedza.
UBanga ubhubhe NgoLwesihlanu lweviki edluleyo, abemuli izihlobo labangane besithi balahlekelwe kakhulu kanye lelizwe lonke.
Ekhuluma emgcwabeni, umfowabo ka Banga uMnu Augustine Banga uthe okubazwisa ubuhlungu yikuba inhlolisiso eyenziwa ngodokothela umuntu nxa etshonile, ipost mortem kayivezanga ukuba ubulewe yini.
Umnawakhe kaBanga uMnu Cuthbert Banga uthe umfowabo ube engumuntu olothando njalo emanyanisa imuli.
Owasebenza lomuyi eHarare Polytechnic uMnu Admire Masuku uthi uBanga ubatshiye bengela nkani.
Omunye njalo owasebenza loBanga, uMnu Terrence Antonio, uthe intathelizindaba labafundi balahlekelwe kakhulu.
Abafundela ukuba zinthathelizindaba lakwezinye inhlangothi zezifundo eHarare Polytechnic baze ngobunengi bekhala ngokulahlekelwa abakwenziwe ngu Banga besithi ubengumuntu wabantu njalo ehlalisane kuhle labanye.
Abanengi bafakaze nge mpilo yakhe besithi ube engumuntu ozithobileyo njalo eqakathekisa ukuthula lothando.
UBanga wasebenzela umsakazo oweZimbabwe Broadcasting Cooperation okweminyaka eminengi kanye le Studio 7 eye Voice of America, kusukela ngomnyaka ka2003 isungulwa. UPeter wayesebenzisa ibizo lokuthi Safari Njema egxile ekulobeni indaba zabakhubazekileyo kuhlelo olusakazwa ngolimi lwesiShona.
Ubhubhe eseleminyaka engamatshumi amahlanu lasitshiyagalombili-58 njalo utshiye uNkosikazi labantwana abathathu.