Abanengi ikakhulu abantwana abancane lasebeluphele yibo abahlaselwe kakhulu yilumqando njalo abanengi basele bevimbene lokukhwehlela abanye bacine besiba lesihlabo.
Abantwana abancane lasebeluphele bayakhwehlela njalo babulawa yizihlabo ezilethwe ngumqando walonyaka oze ngolaka.
UNkosikazi Nothabo Nyathi omunye wabazali ozame ukusa abantwana esibhedlela koBulawayo uthi emakilinika abancedi ngalutho babalayela ukusebenzise imithi yangekhaya enjengamalemoni.
"Kulomqando omkhulu kobulawayo esingakaze siwubone. Abantwana bayakhwehlela njalo bahlathiwe yizihlabo ngokukhwehlela".
Omunye wabantwana besikolo, uZandile Tshuma, uthi njengabantwana besikolo bathwala nzima ukuvuka bebala ebusuku belungiselela imihloliso loba ukubamba impentseli.
"Besikuthola kunzima ukuvuka ebusuku sbala njalo ukubhala bekungelula".
Abantwana abahlala ezitaladeni labo bahlaselwe kakubi yilumqando, kutsho uNompumelelo Dube osebenza labaswele indawo zokuhlala kanye lentandane. Inhlanganiso ezikhangela abaphila ezitaladeni bebezama ukuphathisa ngempahla kanye lokudla okokuthi bazivikele ikakhulu ngenxa yokuthi baswele indawo yokuhlala evikelekileyo.
"Banengi abantwana esibalayele ezibhedlela ukuthi bayethola usizo, abanye bebebuya sibasize ngetiye ukuzikhudumeza".
UDokotela Derrek Matsika, ongomunye wabodokotela koBulawayo, uthi abahlaselwa ngumkhuhlane lo ngabantu abatshiyeneyo.
"Abantu abahlaselwa yilumqando ngabancane labadala abalemzimba engaqinanga njengeyabanye. Izifuba lemkhuhlane yamaphaphu".
UDokotela Matsika uthe abantu kumele bahlale endaweni ezikhudumalayo bengavumeli ukungenwa ngumqando.
Ebantwaneni abancane imizimba ithatha isikhathi ukuthi ize ijayele umumo, lapho yikho abahlaselwa khona yimikhuhlane, ikakhulu nxa ukugula lokhu kungelatshwanga ngesikhathi.
Imizimba ilendlela enza ngayo ukuthi igazi lingahambi ezandleni lemazwaneni liqonde ezithweni zangaphakathi okngacina kubangela ukuthi iminwe kumbe amazwane acine esifa, kwamanye amazwe kuze kuqunywe.
Abalemikhulane ehlasela ukuphefumula enjenge Asma labo basengozini ngenxa yomqando, lapho abazizwa bevaleka. Ijwabu lalo lihlaselwa yikudabuka okucina kusiba buhlungu ngenxa yalumqando.
