Kubikwa kubhubhe umuntu oyedwa NgoMvulo, emzini weTshabalala koBulawayo ngemva kokukhulelwa ngumkhuhlane wesihudo.
Ingwalo zesibhedlela zalumuntu ezibonwe yilumsakazo ziveza ukuba uthwalelwe esibhedlela ngemva kokuhlaselwa yisihudo esinakanelwa ukuba singabe sibangelwe yikunatha amanzi angahlanzekanga.
lzakhamizi zakoBulawayo zithi udubo lokudubuka kwempompi ethwala amanzi alengcekeza laphuma ezambuzini awe-Sewer ngokunye osokubanga ngamandla ukuqhamuka kwesihudo leminye imikhuhlane edolobhen leli.
Abantu bemizini eminengi yakoBulawayo bathi sebehlalela evalweni ngodubuka kwempompi lezi ngoba kungabangela umonakalo omkhulu kwezempilakahle okunjengokuqhamuka kwemikhuhlane yesihudo.
Unkosikazi Sisasenkosi Ndlovu isakhamuzi seNkulumane uthi umumo wamasewer ubuhlungu ikakhulu ezikolo ngoba abantwana behamba phezu kwawo.
“Lapha ohamba khona ubona amasewer edubukile ezikolo worse, abantwana amanzi ayabe engekho ematoilet kungcolile amasewer edubukile ungaze ureport ababuyi. Abantwana abancane bayawela, abanye bayadlalisa besithi ngamanzi sebegula, lndaba yokuvala amanzi ngapha amasewer edubuka ayisiphathi khathesi abantwana bayagula ungakwazi ukuthi baguliswa yini.”
Unkosikazi Sukoluhle Sithole esinye isakhamuzi seNketa uthi isikhathi sezulu siyingozi kakhulu nxa kulegcekeza enjengama sewer.
“Isikhathi sezulu siyingozi kakhulu nxa sikhangela ukuthi amasewer ayabe egeleza ngaleza lezulu lisina okwenza ukuthi indawo yonke igcwale ingcekeza njalo lamanziesiwanathayo kulula ukuthiabe contaminated ngoba amanye ama pipe amanzi esiwanathayo ayabe edubukile abantu besebenatha ingcekeza.”
Unkosikazi Lwazi Mthethwa olomtwana oke wagula umkhuhlane wesihudo elokitshini leNkulumane uchasisa ngokwamehlelayo.
“Umtanami wabanjwa isihudo lesi for 1-month ngihamba kubodokotela ngaze ngacina ngisiya valelwa empilo besithi yityphoid besithi uyabe enathe amanzi from contaminated water sources. Kwakunzima be suspected amasewer adubukayo lokunye, uyabe ungasakwazi uhlezi empilo ukuthi umtwana uzaphuma ephila loba hayi. Ngabe kule kulendlela yokunanzelela ngokudubuka kwama sewer especially emanzini esiwanathayo.”
Omunye wababalisi esikolo seAmavene eNkulumane okhethe ukuzibiza ngokuthi Miss Nyathi wengqabe ukuthatshwa ilizwi kodwa uchaze ukuthi isikolo sabo sihlezi sigeleza isewer kwesinye isikhathi kuyabe kungangeneki emaclassin bacine befundela phandle njalo bangaze babikele ikhansili ayibuyi ngesikhathi.
Imizamo yokuxhumana lekhansili yakoBulawayo yehlule kodwa kuviki edluleyo yazise iStudio 7 ukuthi ithole imibiko yomkhuhlane wesihudo mhlaka 28 Lwezi elokitshini leTshabalala. Njalo kwasekulabantu abedlula amakhulu amabili lengxenye (255) ababanjwe umkhuhlane wohudo.
Ekuqaliseni kwaliviki, uMongameli Emmerson Mnangagwa uthembise izakhamuzi zakoBulawayo ukuthi inhlupho zamanzi zizaphela nxa idamu leGwayi Shangani lingaphela ukwakhiwa. Kuviki edluleyo ugatsha lweZimbabwe National Water Authority lwazise ukuthi idamu leli lizaqala ukukhongozela amanzi ngesikhathi sezulu lonyaka kuthi kusiyaphela umnyaka ozayo idolobho leli liqale ukunatha kulo.
