UNkosikazi Joice Mujuru, owayengumsekeli kaMongameli weZimbabwe, uthi uMugabe labanye bakhe kumele batshiyane lokube bemthethisa njengoba sebeyehlulekile ukuveza iqiniso lobufakazi bokuthi wayefuna ukumbulala loba ukumkhipha esikhundleni.
UMujuru wethule umbiko otshengise ukuzonda kwakhe ngoLwesibili ngokuhlala ethethiswa ngabalandeli bebandla le Zanu PF, esithi ngamanga aluhlaza tshoko ukuthi wayefuna ukubulala uMugabe esebenzisa indlela eyehlela uMongameli Laurent Kabila owasuselwa amanqe kweleDemocratic Republic of Congo ngomunye wabalindi bakhe ibodyguard.
UMugabe utshele umphakathi eGweru ngempelaviki ukuthi uMujuru wayefuna ukumbulala njengalokho okwehlela uKabila. Abaxotshwa loMujuru babalisa uMnu. Rugare Gumbo, uMnu. Jabulani Sibanda, uMnu. Didymus Mutasa labanye abanengi abacatshangelwa ukuthi babefuna ukuthi uMugabe asuswe esikhundleni ngesikhathi somhlangano weCongress yebandla leZanu PF nyakenye.
UGumbo, obambe okwesikhatshana isikhundla sesikhulumeli sebandla elicatshangelwa ukuthi lizabunjwa nguNkosikazi Joice Mujuru ele People First, utshele iStudio 7 ukuthi uMugabe ukhuluma angakwaziyo.
“Umuntu wonke uyakubona ukuthi sebephelelwe lababantu. Abakwazi abakukhulumayo. Ngamanga abakukhulumayo. Ngaliqiniso ngabe sonke savalelwa ejele.”
Sixhume njalo uMnu. Joseph Tshuma okudale leCentral Committee kubandla leZanu PF othe uMujuru ulelungelo lokukhuluma santando.
“Kumele akhulume akufunayo njengoba elelungelo lelo elibekwe kusisekelo sombuso welizwe. Kodwa-ke okumele ngikubeke sobala yikuthi asazi sonke ababili laba abakhuluma ngakho ngakho-ke thina esicubungula indaba ezinje akumelanga ukuthi siyenze engani siyakwazi okwakhulunywa yibo (Mugabe loMujuru).
“Okuqakathekileyo yikuthi nxa ebona engani abantu bakhuluma okungayisikho ulelungelo lokuaya emthethwandaba ukuyalwisana lakho.”
UKabila wadutshulwa ngomunye wabalindi bakhe ngomnyaka ka2001 eDRC.