Umongameli Robert Mugabe ubikwa ewile enkundleni yendizamtshina eye Harare International Airport ngoLwesithathu ngemva kokukhulumisana labasekeli bebandla lakhe abakade beze ukuzomhlangabeza evela kwele Ethiopia ukuyangena umhlangano wenhlanganiso yomanyano wamazwe abensundu eye African Union lapho aphiwe isikhundla sokuba ngumgcinisihlalo wayo.
UMugabe ubikwa ewe phambi kwamakhulu abantu ngemva kokukhubeka esehla emastepisini alapho akade eme khona ekhulumisana labasekeli bakhe.
Umkhokheli weZimbabwe osele minyaka engamatshumi athoba munwe munye-90 njalo ezathakazalela ilanga lakhe lokuzalwa yonale inyanga kaNhlolanja ubikwa eze wancediswa ukusukuma ngabalindi bakhe ngemva kokuncambalala okwemizuzu ethile.
Kunjalo abalindi bakhe lenhloli zeCIO babikwa bebuthanise intathelizindaba ezibone konke lokhu kusenzakala ezixwayiswe ukuthi zesule yonke imifanekiso kaMugabe ebhazalele phansi.
Isikhulumeli sikamongameli uMnumzana George Charamba walile ukukhuluma ngelesi sehlakalo esithi kasilani lentathelizindaba.
UMugabe usevame ukwethekelela emazweni anempumalanga ukuyakwelatshwa Kanye lokukhangelwa nje impilakahle yakhe njengomuntu osekhulile kangaka kodwa uCharamba uhlala etshela abezindaba ukuthi uyabe esiyakwelatshwa ilihlo ache langesandleni sokudla elihlala limhlupha.
Abantu abakhulunwe labo yilumsakazo bathi akumangalisi ukuthi uMugabe awe ngoba useluphele njalo ukube lokhe abantu bemkhetha ukuthi akhokhele yikumhlupha nje.
Ibandla leZanu PF libikwa lifake umbiko ebulenjini beInternet ekhasini lalo leTwitter lixwayisa abantu ukuthi bengemukeli amahungahunga okuthi uMongameli Robert Mugabe uwile yena ubezeqela nje njengalokho okwenziwa ngabantwana bezidlalela.
Abezindaba labo basole ukucitshiswa kwabo imifanekiso kaMugabe ecambalele phansi lapho aze awe, besithi lokhu yikuphazamisa ukusebenza kwentathelizindaba.
Ngaphambilini engakawi uMugabe utshele abasekeli bakhe ukuthi wamukele ngenjabulo ukukhethwa kwakhe ukuba ngumgcinisihlalo wenhlanganiso yamazwe abensundu eye African Union, wathembisa ukusebenza gadalala ukuthuthukisa leli zwekazi.
UMugabe uzaphatha intambo zokukhokhela i-AU okomnyaka owodwa ethatha isikhundla esitshiywe ngumongameli Mohamed Ould Abdel Aziz wele Mauritania.