Idale le Constitutional Court ngoLwesithathu lilahlele khatshana udaba olwethulwa nguNkosikazi Joce Mujuru olokuthi imali yamabond notes emele isungungulwe ekupheleni kwenyanga ezayo ingazavunyelwa ukusebenza elizweni.
Okhokhela abehluli, uMnu. Godfrey Chidyausiku, uthe uNkosikazi Mujuru uphangise ukwethula loludaba ngoba lemali yakhona ingakaqali ukusebenza njalo kungaziwa lokuthi uhulumende uzasebebenzisa ndlela bani ukuthi athole imali le.
UNkosikazi Mujuru ubemelwe nguMnu. Lovemore Madhuku, okhokhela njalo ibandla le National Constitutional Assembly.
Kodwa uChidyausiku uthe uMujuru ulelungelo lokukhweza loludaba emthethwandaba we High Court.
Imizamo yokukhuluma loMujuru kumbe iziphathamandla zebandla lakhe yehlule.
Kodwa iStudio 7 yenelise ukuxoxa loNkosikazi Dorcas Sibanda owebandla leMDC-T othi imali yama bond notes akumelanga isetshenziswe ngoba izaletha udubo olufana lomnyaka ka 2008.
"Udaba lwama bond notes ngiyalubona sibili yinto enhle kodwa udubo yikuthi azathengani. Imali kumele kube yimali yokuthi ungaphuma layo elizweni uyenelisa ukuthenga kwamanye amazwe," kutsho uSibanda.
