Umsekeli kameya wedolobho lakoBulawayo, uMnu. Tinashe Kambarami, usemiswe ukuba ngukhansila kaWard 3 ngumahluli wedale leHigh Court, uMnu. Thomson Mabhikwa.
UMabhikwa uthethe isinqumo lesi kudaba oluphanyekwe emthethwandaba lo yinhlanganiso ye1893 Mthwakazi Restoration Movement ethi kangenanga kahle kukhetho lwamakhansila ngoba wake wamiswa emthethwandaba esetheswa icala lokweba.
UKambarami, ophume kumabona kude ezama ukususa umabhalane wedolobho leli esikhundleni umeya ekwele South Africa, ukumanyano weMovement for Democratic Change Alliance.
Igqwetha lika Kambarami, uMnu. Maqhawe Mpofu, owenkampani yamagqwetha iSamp Mlauzi and Partners, walile ukukhuluma lentathelizindaba.
ISahluko 119 esibona ngezokhetho kanye leSahluko 41 kusisekelo sombuso esibona ngemithetho yokusebenza kwamakhansili sithi umuntu oke wabotshwa wafumanwa elecala akumelanga aphathe isikhundla kukhansili.
UKambarami usanda kubika ukuthi wathunjwa ngabacatshangelwa ukuthi ngamapholisa ensitha awamgela inwele zakhe ezinde esebenzisa imbhodlela.
UMnu. Godfrey Nyoni, owenkampani yamagqwetha eyeNyoni and Moyo Partners omele abeqembu elizibiza ngokuthi yi1893 Mthwakazi Restoration Movement (1893MRM) loNomalanga Dabengwa abaphanyeka udaba lokusola ukukhethwa kuka Kambarami ukuba ngukhansila, uthi kuyajabulisa okwethulwe ngumahluli wedale leHigh Court.
UNkosazana Cora Ndebele, owenhlanganiso ye1893 MRM, uthe uyathokoza ngokwethulwe nguJustice Mabhikwa.
Ngomnyaka odluleyo ngoNtulikazi, uKambarami wamiswa phambi kwedale likamantshi koBulawayo esetheswa icala lokweba intambo yamandla kagetsi emuntwini ayecele ukuba azolungisa okufileyo emzini wakhe.
UKambarami walivuma icala lokweba wahlawula amadola angamatshumi ayisifica minwe mibili.
Ababebotshiswe yi1893 MRM loDabengwa ngodaba luka Kambarami, yikhansili yedolobho lakoBulawayo, inhlanganiso ebona ngezokhetho iZimbabwe Electoral Commission kanye lebandla leMDC njalo laba bonke abazange bamelane lokubotshiswa lokhu ngaphandle kuka Kambarami.
Idale leHigh Court ngoLwesine belilindwe ngamapholisa ahlomileyo njalo bekuvalwe zonke indlela eziqonda kuleyondawo.
Kusenjalo, amalunga ebandla leMthwakazi Republic Party amahlanu abotshwe ngoLwesibili akhangelelwe ukumiswa phambi komthethwandaba ngoLwesihlanu.
Amalunga la ababalisa uPatrone Xaba, Prince Ncube, Ackim Ndebele, Mongameli Mlotshwa, loNdabazelizwe Ncube. Bavalelwe enkambeni yeCentral Police Station koBulawayo. Betheswa icala lokuhlabela bebanga umsindo phandle kwedale leHigh Court ngoLwesithathu kanye lokuthwala amagwaliba athi uNdiweni kakhululwe.
UDumisani Dube weMathonsi Ncube Law Chambers nguye omele amalunga la.
