Umqeqetshi weqembu leHighlanders uthi uzakupha ithuba abadlali abanga jwayelanga ukudlala imidlalo yeligi ngeSonto lapho iqembu lakhe elizadibana khona leleDynamos ku final yenkezo yemncintiswano weZNA Commanders Charities shield enkundleni yeRufaro
Ekhuluma lentathelizindaba zemidlalo ngoLwesine emini umqeqetshi weqembu le Highlanders uBongani Mafu uthe isifiso sakhe yikuba ayedibana le Dynamos eleqembu elilabafana abangajwayelanga ukudlala ukuze ababone ukuba bayenelisa yini.
UMafu uthe abafana laba ngabagoqela uGodfrey Makaruse kanye lo Obert Tafira kodwa uphinde wathi inkinga abhekane layo ngeyokuba iqembu le Bosso selidliwe kakhulu liqembu le Dynamos okokuthi lingaphinda litshaywe njalo nxa engadlalisa abasakhulayo bodwa kodwa uzazama ukuxubanisa abadlali.
Lumdlalo upha iqembu le Bosso ithuba lokulungisisa amaphutha alo afana lokungakhabeli egedini obekusenziwa ngabagadli baleliqembu okuyinto uMafu athi uyikhulume lakuntatheli ekupheleni komdlalo ukuze abadlali bakhe bantshintshe ukwenza kwabo loba nje abanye bebemsola bethi kungani eyitshukele ebandla.
Iqembu elizanqoba kumdlalo we final phakathi kwe Dynamos le Highlanders lizathola inkulungwane ezilitshumi lambili zamadola asemelika kanye lenkezo kuthi lelo elizanqotshwa lizathola inkulungwane eziyithoba minwe mbili.
Womabili lawa maqembu azabe engalabadlali abadlala kuqembu labaleminyaka engaphansi kwamatshumi amabili lantathu elimela ilizwe emdlalweni wenguqu lona elizabe liselizweni le South Africa ukuyaphatheka kumkhankaso wokudinga amaqembu azakuyadlala kumidlalo ye African Championships.
Iqembu le Highlanders lizabe lingela Knox Mutizwa, uTeenage Hadebe kanye lo Nqobizitha Masuku kuthi ele Dynamos lizabe lingela Blessing Moyo kanye lo Tatenda Mukuruva.