Izizalwane zeZimbabwe sezincome ubuhle bombuso ohlonipha intando kazulu kweleSouth Africa ngemva kokuba amabandla amabili aphikisayo kulelozwe ese uMongameli Jacob Zuma emthethwandaba. Laye wavuma kungela masotsha loba amapholisa atshaya abantu.
La amabandla ase umongameli Zuma emthethwandaba ngoba efuna abhadale enye yemali kazulu eyasetshenziswa ekuthuthukiseni ezomvikela emzini wakhe.
Inkulungwane zabasekelei bebandla le Democratic Alliance (DA) le Economic Freedom Fighters (EFF), batshengisele behlabela lokugiya phambi komthethwendaba weSisekelo sombuso eJohannesburg, besekela ukuthi uZuma ahlawuliswe enye yemali yomphakathi eyasetshenziswa emzini wakhe.
Amaviyo ezomvikela kamongameli asebenzise izigidi ezilitshumi lanhlanu zamadola enhlelweni zokuvikela uZuma emzini wakhe eNkandla. Ngemva kwalokho umvikeli womphakathi unkosikazi Thuli Madonsela walaya ukuthi uZuma ahlawule enye yemali eyasetshenziswa ukwakha isibaya senkukhu, esenkomo, indawo yokubhukutsha lomduli wokuzithokozela.
Yiloke okwenze la amabandla aletha uZuma emthethwandaba ukuze abanjwe ngamandla ukuthi abhadale.
Izizalwane zeZimbabwe zithi yinto engcomekayo kakhulu eyenziwe nguZuma ukuvuma ukusiwa emthethwandaba ekhonbisa ukuthi laye uyawuhlonipha umthetho.
Abanye bathi okuhle yikuthi ngesikhathi kuthethwa leli cala bekulezinkulungwane zabasekeli bala mabandla phandle komthethwandaba kodwa akula ngitsho loyedwa otshaywe ngamapholisa kumbe ngamasotsha.
Unkosikazi Nomvethe Johana, ngomunye wezizalwane zakweleSouth Africa ebezitshengisela.
"Akungeke kulunge ukuba umuntu emunye neqoqwana nabantu bakhe abangabangane nefamily badle bamotshe kodwa abantwana la ngaphandle nxa ungajonga ngempela ngempela isizwe sakithi siyalamba, siyahlupheka sihlala ematshotshombeni".
Isizalwane seZimbabwe esidume ngokulwelwa kwamalungelo oluntu umnumnzana Godfrey Phiri uthi kunengi okufuze kufundwe yiZimbabwe kweleSouth Africa.
"Kuqakatheke kakhulu ukuthi abantu beseZimbabwe bafunde, bajwayele lokuzimela ngoba amapoliticians nxa bebona abantu sebengathi kabacabangi bayabacabangela. Kwenza ukuthi sinike abantu amandla abazosincindezela ngawo nakusasa".
Abanyeke bathi bathokoziswe yikuthi amagqwetha kamongameli Zuma avumile ukuthi umongameli uzayihlawula leyo mali nxa esazisiwe ukuthi yimalini.
Kodwa abanye abafana lo mnumnzana Luke Ndlovu bathi ngaphandle kokuthi uhulumende weZimbabwe aguqule indlela abusa ngayo, umbuso okhululeke njengowakweleSouth Africa ngeke ubekhona eZimbabwe.
"NgaseZimbabwe ngeke kwenzakala ngoba umthetho owavele wabekwa iconstitution yakhona yavele yaqina vele yasivikela yena umongameli wakhona so akukho ngenye indlela okungenziwa ngakhona".
Uthike labo bakhalela ukuthi bayithole inkululeko yokusola inkokheli zabo ngenkulumo, ngezingoma langetoyitoyi kungela kubhaxabulwa.
