Umongameli Phillipe Nyusi wele Mozambique ngoLwesihlanu uvule okusemthethweni umbukiso wezokulima owe Harare Agricultural Show ekhuthaza ukusebenzelana phakathi kwelizwe lakhe lele Zimbabwe kwezokulima.
UMongameli Nyusi nguye obe ngumhlonitshwa kulumbukiso ongene kulanga lawo lesihlanu eHarare.
Ucasise ukuba eleZimbabwe lilolwazi olujulileyo emisebenzini yokulima njalo liyisibonelo esihle kwamanye amazwe asemkhonweni wezansi yezwekazi le Africa.
Uqubeke ethi ubuncitshi lolwazi olukhona kuleli kwezokulima lokufuya kungaphathisa ukuba elakhe lalo lifunde okunengi okungalithuthukisa kulumsebenzi ngoba okwamanje lisebenzisa isilinganiso sokulitshumi lanhlanu ekhulwini- 15% nje kuphela somhlabathi walo wonke elilawo. Ethi ele Zimbabwe liyisibonelo sokuba amazwe akulumkhono angenelisa ukulima aphinde elungise izinto ezivela kusivuno sayo okuyinto engatholisa abantu imisebenzi kunye le mali abangaphila ngayo kuqede indlala njengokukhuthazwa ngamazwe ase Africa okuba ezidingele indlela zokulungisisa inkinga abhekana lazo ekhonapha e Africa.
UNyusi wethekelela kuleli okwakuqala ngomsebenzi selokhe wathatha intambo zombuso elizweni lakhe lonyaka. Ngaphambilini kokwethula umbiko wakhe wokuvula okusemthethweni umbukiso walonyaka ubonakale ebhodabhoda ekhangela okubukisiweyo ekhatshwe ngomunye wakhe umongameli Robert Mugabe.
Abalimi abavela ezabelweni ezitshiyeneyo zelizwe babukisa izilimo abo njalo amabhizimusi atshiyeneyo lawo etshengisa akwenzayo okugoqela amakolitshi emfundo yaphezulu.
Umqondisi kwezokokhulumisana ekolitshini le Lupane State University umnumzana Zwelithini Dlamini uthi ikolitshi lakhe lifundisa liphinde liveze indlela ezingaphathisa uzulu ezifana lemithi yokulwisana lokuphehlwa kwesivuno eziphaleni.
UDokotela Mangena wekolitshini le Gwanda University uthi sebephatheka ezifundweni ezikhangelane lokuphathisa uzulu otholakala kuleso sabelo, zihambelana labakwenzayo kunye labaphila ngakho njengezakhamizi.
Umbukiso we Harare Agricultural Show lo, usuleminyaka edlula elikhulu usenziwa njalo lonyaka uqutshwa phansi kwesihloko esithi “Ukuthuthukiswa kwemisebenzi yokulima kunanzwa umumo womkhathi”.
Lumbukiso uphela ngoMgqibelo njalo wenziwa ngesikhathi ele Zimbabwe libhekane lwendlala enkulu kulokusilela kokudla lithenga umumbu kwamanye amazwe njengendlela yokwenqabela lindlala.