UMongameli waseMelika uMnu Donald Trump wethule amazwi akhe amqoka phambi kwamadale ephalamende womabili, aweCongress, ngoLwesibili wazikhukhumeza esithi usefeze okunengi phakathi kwamaviki ayisithupha kuphela adluleyo esembusweni.
Uthe uqhube kuhle kakhulu kunyanga yakuqala esemsebenzini ukwedlula abanye bonke oMongameli beMelika.
Okwakuqala, uthe usenelise ukwehlisa inani labantu bokuza abafohla umngcele bengena elizeni lakhe bengelamaphepha.
“Ngisanda kuthatha intambo zombuso ngathumela amabutho emngceleni wethu osezansi ukuyavimba ukungena kwabokuza abangelamaphepha. Enze umsebenzi omuhle kakhulu ngoba inani labafohlayo lehlile kakhulu ngenyanga edluleyo,” kutsho uMongameli Trump.
Usole kakhulu owayenguMongameli weMelika phambi kwakhe uMnu Joe Biden esithi uyisehluleki sokucina esatshiya sibulele umnotho, wona athi usewuvuselela.
Uthe, “Injongo yami emqoka ngeyokuhlenga umnotho ukuze izimuli ezisebenzayo ziphefumule kuhle. Njengoba likwazi, uhulumende odluleyo usitshiyele umnotho oguqe ngamadolo lentengo ezikhuphuka njalo-nje.”
Ekhuluma phezu kwesinqumo sakhe sokumisa imali eyayiphiwa amazwe atshiyeneyo nguhulumende weMelika uTrump uthe imali le yadlaliswa emazweni agoqela lawo aseAfrica afana leLesotho, Liberia, Mozambique, Zambia, leUganda.
“ELesotho, ilizwe elingaziwa muntu, iMelika yadlalisa iUS8 million ithuthukisa inhlelo zezitabane, i$10 million yokusoka abafana eMozambique, i$1 million yenhlelo zokuvota eLiberia, i$14 million yokuhlanganisa abantu eMali le$15 million yokuhlalisa abokuza abangelamaphepha edolobheni leNew York,” kutsho uTrump.
UMongameli Trump uthembise ukwehlisa imithelo lentengo yempahla etshiyeneyo, ukuthuthukisa impilo zabantu kanye lokuqeda impi ephakathi kweUkraine leRussia.
Uthe lanxa umhlangano wakhe loMongameli weUkraine uMnu Volodymyr Zelensky ungahambanga kuhle ngeviki edluleyo, uZelensky usembhalelwe incwadi emazisa ukuthi uzimisele ukusayina isivumelwano leMelika esizakhokhelela kunkulumo zokukhumisana umlotha leRussia.
UTrump uthe ugatsha lwakhe olutsha olweDepartment for Government Efficiency, olukhokhelwa yinkisela enothe ukwedlula umuntu wonke emhlabeni uElon Musk, luzaqhubeka lugumula izisebenzi zikahulumende umsebenzi ukuthi kulongolozwe imali.
Le yinto esolwe kakhulu nguSenator Elissa Slotkin, owebandla eliphikisayo elamaDemocrats, yena ophendule amazwi kaTrump Emele lelibandla.
Uthe, “Ukuxotshwa umsebenzi kwabantu abavikela izikhali zethu ze-nuclear, abalawula ukuhamba kwendizamtshina labadinga imithi yokwelapha imvukuzane, besebebuyiselwa futhi emsebenzini ngemva kwensuku ezimbili – akekho umholi wenkampani ongenza lokho ehluleke ukuxotshwa umsebenzi.”
Umphakathi wamukele amazwi kaTrump ngemibono ehlukeneyo. Umsekeli wakhe uMnu Grater Vodloza Sibanda utshele iStudio 7 ukuthi uyakusekela okwenziwa nguTrump, yena athi ungumholi oqotho.
Kodwa ingcwethi kwezombusazwe uMnu Effie Dlela Ncube uthi lanxa uTrump esegcwalisile ezinye izithembiso zakhe, zinengi inhlelo zakhe eziphikiswa ngitsho labebandla lakhe lamaRepublicans.
UTrump ukhulume njalo ngokudutshulwa kwakhe ngesikhathi ekhankasela ukhetho nyakenye esithi wasindiswa nguNkulunkulu ukuze aphakamise iMelika ibuyele ekubeni lilizwe elilamandla amakhulu.
Forum