UMongameli weMelika omutsha uMnu Donald Trump uqale umsebenzi ngoMvulo ngokusayina iziqondiso ezinengi ezigoqela esokuvimba ukungena mahlayana kwabantu abangelamaphepha kulelilizwe lesokumisa imali yenhlelo zentuthuko ephiwa amazwe atshiyeneyo nguhulumende weMelika.
Njengokuthembisa kwakhe ngesikhathi ekhankasela ukhetho, uTrump uhle wavala umngcele weMelika leMexico ngosuku lwakhe lwakuqala wathumela lamabutho kulumngcele kulandela ukufungiswa kwakhe.
“Silohulumende onikeze imali engelamkhawulo ekuvikeleni imingcele yangaphandle, kodwa wenqaba ukuvikela imingcele yaseMelika, " kutsho uTrump ngesikhathi ethatha isifungo.
Esayina isiqondiso esiphathelane laloludaba kumbe i-executive order, uTrump uthe akuselabantu abadinga ubuphepheli eMelika abazavunyelwa ukungena kulelilizwe emngceleni walo leMexico lapho okufohla khona abantu abanengi bevela amazweni afana layo iMexico, Honduras lamanye atshiyeneyo.
Uthe bonke abadinga ubuphepheli kulumngcele kumele bahlale kweleMexico ngesikhathi izicelo zabo zisahluzwa nguhulumende weMelika.
UMongameli Trump usayine njalo isiqondiso esiphuca ubuzwe beMelika abantwana babantu abangelamaphepha abazalelwa kulelilizwe lanxa isisekelo sombuso welizwe sikuvumela lokhu.
Kodwa olandela ezombusazwe zeMelika uMnu Tim Muringai udaba lolu luzahlupha ngoba kudingeka ukuba iPhalamende yeMelika ingenele ukuze kuguqulwe isisekelo sombuso, i-constitution.
Uthe, “Kuyabe sokumele akhiphe i-14th amendment kodwa lokhu akulula ngoba kumele kube leCongress leSenate ukuthi zivotele izinto ezinjalo. Yinto ekusisekelo sombuso welizwe… Abantu abanengi abakujabuleli ukuguqulwa kwesisekelo sombuso.”
UTrump wethule njalo isiqondiso esimisa okwenyanga ezintathu usizo lwemali ephiwa amazwe atshiyeneyo yiMelika ekhangelane lenhlelo zentuthuko, i-foreign development assistance, esithi enye yalimali isetshenziswa ngendlela engafanelanga ekhuthaza ukungahlaliseki lokungazwanani kulawomazwe.
Wengeze wathi uhulumende wakhe uzahlaziya lezonhlelo kusiya ngelizwe andubana athathe isinqumo sokuthi uyaqhubeka eziphathisa ngemali yini kumbe uyavala lolosizo kokuphela.
EleZimbabwe lalo liyathinteka kuloludaba ngoba lithola imali enengi evele kweleMelika.
UMuringai uthi lanxa engavumelani lenhlelo zikaTrump ezinengi uyavumelana lalelinyathelo.
“Emazweni amanengi inkokheli efana leyeAfrica iyayitshaphaza limali uthole ukuthi abantu okumele baphathiswe ngayo abatholi lutho.”
UMongameli Trump usayine njalo isiqondiso esikhipha eleMelika kunhlanganiso yeUnited Nations ebona ngenhlelo zempilakahle, i-World Health Organization, lakusivumelwano samazwe atshiyeneyo esokulwisana lokuguquka komkhathi eseParis Agreement.
Osekela uTrump uMnu Greater Vodloza Sibanda uthi uyavumelana lezinqumo zikaTrump.
"Izinto zonke lezi azikhulume izolo egcotshwa wazikhuluma ngesikhathi ekhankasa. Uzathola ukuthi abantu abanengi abamsolayo akusibobantu beMelika,” kutsho uSibanda
Esinye njalo isiqondiso esisayinwe nguMongameli Trump ngesokunqaba ukuqhatshwa kwezisebenzi ikahulumende, zona athi ufuna ukugumula ezinengi zazo ngoba uhulumende edlalisa imali.
Forum