UMongameli Lazarus Chakwera wakwele Malawi ubika ukuba umsekeli wakhe, uMnu. Saulos Chilima,ubhubhe engozini yendizamtshina kulelolizwe ngoMvulo.
UChakwera utshele abezindaba abe-Reuters ukuba uChilima ubhubhe labanye abayisificamunwemunye engozini le eyenzakale ezintabeni esabelweni seMzuzu.
Ibutho lakwele Malawi labahlenga uzulu bathethe phose ilanga lonke bedinga indizamtshina yohlobo lwe-helicopter ebithwele uChilima.
UChakwera uthe abanye ababhubhe engozini le nguNkosikazi Shanil Dzimbiri, umfelokazi kaBakili Muluzi, owake wakhokhela eleMalawi.
Indizamtshina le esuke ekuseni eLilongwe bekumele iphaphele emagcekeni eMzuzu Airport kodwa kwehlula ngenxa yokufiphala komkhathi.
Abohlangothi olubona ngezokuphapha kwendizamtshina kwele Malawi besebetshele abatshayeli bayo ukube bebuyele eMalawi kodwa kukhanya engani bekungasabonakali kahle ukuthi bayangaphi ngenxe yokufiphala komkhathi.
UChakwera uthi bonke akade besendizamtshineni le batshabalele engozini le. Kulemifanekiso egcwele emphakathini etshengisa isehlakalo lesi.
UChilima obekwele South Korea lapho abesemhlanganweni wezamabhiimusi wenkokheli zezwekazi leAfrica lelizwe leli, ubuyele ekhaya ngeSonto.
UChilima oweyekhokhela ibandla leTransformation Movement wamanyana loChakwera ngomnyaka ka2020 benqoba kukhetho bekubandla leTonse Alliance.
Ubudlelwano kwababili laba bebungahambi kahle kulandela ukuveza kuka Chilima ukuthi uzancintisa kukhetho lukamongameli oluzaqhutshwa ngomnyaka ozayo.
Wabotshwa ngomnyaka ka2022 wetheswa icala lobukhohlakalo kodwa umthethwandaba wamkhulula ngenyanga ephelileyo.
Ocubungula ezombusazwe ezimele, uMnu. Nhlanhla Moses Ncube, okunhlanganiso ye-Freedom Alliance, uthi ilizwe leMalawi lilahlekelwe yindoda emadodeni.
Forum