Onqotshwe kukhetho lokudinga umgcinisihlalo weMDC-T koBulawayo uMnu Matson Hlalo secele idale leHigh Court ukuthi lesule impumela yokhetho lolu ngoba lungaqhutshwanga kakuhle.
UHlalo uphikisa ukukhethwa kukaMnu Gift Banda esithi uBanda ubengamelanga angene kulesisikhundla ngoba engakafikisi iminyaka edingakalayo elilunga lebandla ukuze enelise ukuncintisa kukhetho.
UMnu Hlalo umangalele umkhokheli webandla uMnu Morgan Tsvangirai, umgcinisihlalo webandla uMnu Lovemore Moyo laye uMnu Banda.
Udaba lolu luhluzwe ngumthethwandaba namuhla njalo umahluli uthe uzakwethula isinqumo sakhe ngoLwesine.
Kunjalo nje, Ibandla leMDC-T lithi selizilungiselele ukuqhuba umhlangano walo weCongress ekupheleni kwenyanga lapho okuzakhethwa khona abakhokheli balelibandla abatsha.
Ibandla leli ligqibe ngempelaviki edluleyo uhlelo lokukhetha abazancintisa ezikhundleni ezitshiyeneyo kuCongress eqala mhlaka 30 iphele mhlaka 1 ngenyanga ezayo.
Sixhume umsekeli kamabhalane obona ngokuqoqwa kwenhlelo zalelibandla uMnu Abednico Bhebhe.
