UMnu. Hatirarami Momberume olilunga lesonto ye Johane Marange Apostolic obikwa engumyeni wentombazana eyabhubha ibeletha ileminyaka elitshumi lanhlanu umiswe phambi komthethwandaba ka mantshi eMutare ngoLwesihlanu esetheswa icala lokudlwengula lelokubangela ukufakwakhe.
Igqwetha elimmelayo, uMnu. Brian Majamanda utshele iStudio 7 ukuthi umantshi uNkosikazi Lynne Mary Mungwari uthe uMnu. Momberume ukhangelelwe ukuphindela njalo kulumthethwandaba mhlaka three ngenyanga ezayo.
Uthi bazazama njengamagqwetha ukubona ukuthi uthoniswa engavalelwanga entolongweni ngemva kokuncitshwa imvumo yokuthi akhululwe ngemali yesibambiso eyebail okutsho ukuthi okwamanje uzakube elokhe evalelwe. Umtshutshisi uMnu. Tirivanhu Mutyasira utshele lelidale ukuthi uMnu. Momberume ulakho ukubaleka ngenxa yecala aletheswayo.
UMnu. Majamanda uqhubeke wathi balindele impumela yeDNA test ethethwe izolo, eyokudingisisa ukuthi uMnu. Momberume, oleminyaka engamatshumi amabili lasithupha-26, nguye yini owabangela ukuthi umuyi akhulelwe.
Embikweni owethulwe izolo, isikhulumeli samapholisa uMnu. Paul Nyathi uchasise ukuthi igama lomuyi nguAnna Machaya, hatshi uMemory Machaya njengalokho obekuphuma enkundleni zebulenjini.
Uthe wakhulelwa eleminyaka elitshumi lane, wabeletha eseleminyaka elitshumi lanhlanu, njalo uMemory yisihlobo sikamuyi esileminyaka engamatshumi amabili lambili 22, esendele eMhondoro kuMnu. Lameck Makonye Sigodla oleminyaka engamatshumi amahlanu lane-54
UAnna ubhubhe ngenyanga edluleyo eMafararikwa eMarange.
UMnu. Nyathi uthe abazali bakamuyi; uNkosikazi Shy Mabika loMnu. Edmore Machaya abangamalunga esonto ye Johane Marange, betheswa icala lokuvimbela amapholisa ukuthi adingisise kuhle ngaloludaba kanye lelokwendisa umntwana oleminyaka ephansi kulalelyo evunyelwa ngumthetho.
