Ukufuthelana phakathi kukamqoqi wenhlelo zeMDC-T uMnu Nelson Chamisa leMDC-T Veterans Activists Association kuqhubekele phambili ngoMvulo inhlanganiso le isithi izakwenza konke okusemandleni ayo ukuvimba ukukhethwa kukaChamisa ukuba ngunobhala jikelele walelibandla kuCongress ezakwenziwa ngoMfumfu.
Ukungezwani lokhu kuqhamuke ngoMgqibelo ngemva kokuba uChamisa etshele umhlangano weMDC-T Provincial Assembly koBulawayo ukuthi kayinanzi linhlanganiso ngoba ingekho emthethweni.
Lokhu kucunule amalunga alinhlanganiso wona abize umhlangano ngeSonto avumelana ukuthi esikhundleni sokudinga unobhala jikelele, azasekela isikhulumeli sebandla okwamanje uMnu Douglas Mwonzora lanxa engakatsho ukuthi uyasifuna lesisikhundla. UChamisa laye kakatsho.
IStudio Seven ixhume isiphathamandla seMDC-T Veterans Activists Association uMnu Khumbulani Sibanda yena othe ngokuqalana labo, uChamisa seqale impi angasoze ayikwanise.
Ekhuluma leStudio 7, uChamisa ugcizelele amazwi akhe wathi kayinanzi linhlanganiso. Uthe njalo kuyamangalisa ukuthi inhlanganiso le ikuthatha ngaphi ukuthi ufuna ukuba ngunobhala jikelele webandla ngoba engakakutsho lokho.
UMwonzora yena uthe kasoze ancintise kusikhundla esiyabe sifunwa nguChamisa.