UMongameli Emmerson Mnangagwa utshayele ihlombe uMongameli Vladmir Putin wakwele Russia ngokunqoba kukhetho olusanda kuqutshwa elizweni lakhe, encoma ubudlelwano bamazwe womabili obaqala ngesikhathi sempi yokukhulula eleZimbabwe. Kodwa inengi labantu bayabusola ubudlelwano lobu, besithi kuncane kakhulu okutholwa ngele Zimbabwe nxa kuqathaniswa lamankampani akwele Russia amanengi emba amadayimana lamanye amatshe aligugu elizweni.
UMnangagwa owethule amazwi la emkhosini wokwamukela isipho sengqoloyi lemvundiso ye-fertilizwe eHarare namuhla, uthe kuyathabisa ukuba eleRussia lenze ukhetho lwalo ngendlela ekhululekileyo njalo akula mazwe okumele atshele amanye indlela okumale aqhube ngayo ezokhetho.
''Ngithanda ukutshayela ihlombe kumfowethu uPutin ngokunqoba kukhetho olusanda kwenziwa. Loba bekusola uqhubeka usiya phambili ngokuthula.''
Obemele eleRussia emkhosini lo uMnu Nikolao Krasilnikov uthe le Russia lizaqhubeka lisebenzelana lele Zimbabwe.
“Ilizwe lethu lizaqhubeka lisebenza lele Zimbabwe hatshi kwezokulima kuphela kodwa kunhlangothi zonke.''
UMnangagwa encoma uPutin kulamazwe amanengi emhlabeni wonke jikelele agoqela eleMelika achothoza indlela okuqhutshwe ngayo ukhetho lukamongameli kwele Russia.
Ingcwethi ecubungula ezombusazwqe uMnu. Liberty Dube okunhlanganiso eyeZimbabwe Democracy Platform uthi akuncedi kangako okwenziwa lilizwe leli eZimbabwe.
“Thina sifanana lo Isau owathengisa ubukhulu bakhe ngenxa yokulamba. EZimbabwe sizilambele nje akula okuzaguqulwa yilokhu okuvela eRussia.”
Eyinye njalo ingcwethi ecubungula ezombusazwe efundisa ekolitshini yeUniversity of Zimbabwe, uMnu Mqondisi Tshuma, uthi lolu uncedo lulutshwane kakhulu nxa kuqathaniswa lalokho okuphiwa iZimbabwe ngamazwe afana ngele Melika.
“Uncedo lolu vele alusoze lusisize ukwenza okunengi ngoba akhona amazwe asinikeza okunengi kakhulu.''
EleRussia linike eleZimbabwe inqoloyi efika isilinganiso samathani azinkulungwane ezingamatshumi amabili lenhlanu- 25,000 lemvundiso ye-fertilizer eyisilinganiso samathani azinkulungwane ezimbili lantantu- 23,000.
Uhulumende weZimbabwe wazise namuhla ukuba ilizwe lilokudla okweneleyo lobanje izigidi lezigidi zabantu zibhekane lendlala eyesabekayo.
Kusenjalo, inhlanganiso yeUnited Nations namuhla yethule ugwalo lwayo olujulileyo lenhlalakahle kazulu, olweHuman Development Report oluveza indlela amazwe omhlaba agcina ngayo izizalwane zawo.
Ugwalo lolu luveza ukuba eleZimbabwe likunombolo yekhulu lengxenye - 159 phakathi kwamazwe afika phose amakhulu amabili - 193 ekugcineni izizalwane zalo. Ugwalo lolu olukhitshwe luveza njalo ukuba kulokufuthelana okukhulu emhlabeni wonke jikelele okumele kulungiswe ukuze amazwe omhlaba abe lokuthula.
Ngesikhathi umhlaba uthakazelela imisebenzi eyenziwa ngabesifazana ngalinyanga kaMbimbitho eyeWomen’s Month, ugwalo lolu luveza ukuba emhlabeni wonke jikelele isimo sabomama asimanga kuhle selokhe kwaphela ubhubhane lweCovid-19.
Ingcitshi kwezomnotho uNkosikazi Grace Sibindi osebenza le Economic Forum uthi kumele amazwe wonke aqakethisa isimo sabomama ukwenzela ukuvuselela umnotho wasemhlabeni jikele.
''Kufuze uhulumende aqakathekise omama ukuze kuvuselelwe umnotho wethu. Kusobala ukuba omama siqhubeka sikhangelelwa phansi okusibisela emuva."
Ugwalo lolu luveza ukuba umhlaba ubhekane lenhlupho ezifana lokuguquka komkhathi, indlala lokunye okumele kulungisiswe emazweni womhlaba jikelele.
Forum