UMongameli Emmerson Mnangagwa ngoMvulo ugcizelele isithembiso sakhe sokuthi kasoze aqhelise umbuso wakhe ngomnyaka ka2028, lapho okuphela khona amahlandla akhe okubusa amabili avunyelwa yisisekelo sombuso welizwe.
UMnangagwa utshele abahleli bezindaba eHarare ukuthi lanxa abasekeli bakhe besithi kumele eqhubeke esembusweni, kasoze akwenze lokhu ngoba uhlonipha umthetho.
Wengeze wathi amalunga eZanu PF aqotho lawo kumele asihloniphe isisekelo sombuso welizwe.
Uthe kungenzeka ukuba abanye abafuna ukuthi eqhubeke ebusa ngabantu abalenjongo ezimbi abazenza amalunga eZanu PF ngemvunulo kuphela.
Ngesikhathi esethula amazwi la, umsakazo weZBC – wona olawulwa nguhulumende – ubike ukuthi ibandla leZanu PF lizaguqula isisekelo sombuso ukuze kuqheliswe umbuso kaMnangagwa.
Kulokufuthelana okukhulu kuZanu PF phakathi kwalabo abafuna uMnangagwa aqhelise umbuso wakhe lalabo abathi kumele atshiyele umsekeli wakhe uMnu Constantino Chiwenga.
Owake wamela isigaba seBinga edale lePhalamende elilunga lebandla leCCC uMnu Prince Dubeko Sibanda uthi uMnangagwa ungumkhohlisi.
Kodwa ilunga leZanu PF uMnu Malaki Nkomo utshele iStudio 7 ukuthi uyawakholwa amazwi kaMongameli Mnangagwa.
Forum