UMongameli Emmerson Mnangagwa ukwele Russia lapho akhangelelwe ukuba uzakhulumisana lomkhokheli wakulelolizwe uMnu. Vladmir Putin ngezamabhizimusi, ezombusazwe lempi ephakathi kwelizwe leli lele Ukraine.
UMnangagwa ufike namuhla kwele Russia lapho azangena khona umhlangano omkhulu oweSt. Petersburg International Economic Forum okuzabe kulenkokheli yakwamanye amazwe.
UMnangagwa, uhambe eRussia evela eSouth Korea lapho angene khona umhlangano weSouth Korea – Africa Summit.
Nyakenye ungene umhlangano weRussia – Africa Summit lapho okwalotshelwana izivumelwano ezimbalwa phakathi kwamazwe womabili.
Izivumelwano lezi zazigxile kwezomlilo kagesi, imitshina yakulez’insuku, amatshe aligugu kanye lokuthuthukisa izakhiwo zelizwe.
Okwamanje uleziphathamandla ezimbalwa zakwele Zimbabwe ezigoqela umphathintambo obona ngezemali uMnu. Mthuli Ncube, lomphathintambo obona ngokudlelana lamanye amazwe uMnu Fredrick Shava.
Omunye wabasemhlanganweni lo nguMnu. Masimba Mavaza, omela ibandla leZanu PF kwele Bhilithane uthi umhlangano lo uqakathekile kakhulu.
“Leli lithuba elihle elokuthi uMongameli Mnangagwa athole indlela zokuthuthukisa umnotho welizwe kanye lempilo kazulu weZimbabwe.”
Okubandla eliphikisayo, eleFreedom Alliance uMnu. Nhlanhla Moses Ncube uthi akulalutho oluzaphuma emhlanganweni lo ngaphandle kwalokhu okufunwa nguMnangagwa hatshi uzulu.
“Nxa uvakatshele umngane wakho kumele uke uphenduke uphethe igwadla ukuthi ubuyebona umngane wakho. Manje uyahamba kuphela, kodwa akukaze kuphume lutho, ngakho angiboni ukuthi namuhlanje kulento angayiletha.”
Ingcwethi kwezombusazwe njalo ekunhlanganiso yeCommon Markets for Liberal Solutions, uMnu Rejoice Ngwenya uvumelana lalokhu.
“Asikaze sizwe nje kuthiwa kulento enkulu eke yenzakala ngenxa yokuthi umongameli welizwe uvakatshele eRussia kumbe eChina.”
Kodwa olandela ezombusazwe ekubandla eliphikisayo eleCitizens Coalition for Change uMnu Ambrose Sibindi uthi imihlangano le iyaphathisa ekuthuthukiseni ilizwe.
“Ukuvakatshela amazwe anjengeRussia kuyinto eqakathekileyo kakhulu, ngoba amazwe anjengalawana nxa singawabamba kahle engasincedisa kakhulu ukuthi njengeZimbabwe sithuthuke, kodwa khathesi uhlupho olukhona ngolokuthi ilizwe leRussia lisempini okwenza imali yabo ingani iyehla njalo kube lamazwe amanengi angelabudlelwano obuhle layo.”
EleRussia lilamankampani amanengi enza okutshiyeneyo kwele Zimbabwe. Agoqela eleAlrosa elemba amadayimani elidlelana lenkampani ye Zimbabwe Consolidated Diamond Company.
Kulamanye njalo anjenge United Fertilizer Company, lamanye alungisa imvundiso ethengiswa kwele Zimbabwe lemazweni akuzwekazi leAfrica. Manengi njalo afisa ukwemba amatshe aligugu alokhu edinga ukusebenzela kwele Zimbabwe.
Kukhangelelwe ukuba kungaba lezivumelwano phakathi kukaPutin loMnangagwa ekwenjiweni kwamanye amatshe aligugu.
Okwamanje inkokheli yamazwe womabili iphansi kwezijeziso zenotho ezetheswa ngamazwe entshonalanga athi eleZimbabwe lele Russia zephula ilungelo loluntu njalo zehluleka ukuqhuba ukhetho olukhululekileyo.
Forum