Umkhokheli wenhlanganiso yabasakhulayo abakwezombusazwe, eye Youth Advocacy for Reform and Democracy, umnumzana Themba Mliswa uthi umkamongameli, usesenga lezimithiyo njalo kumele ahlolisiswe isimo senqondo zakhe ukuba zisasebenza kuhle na loba hatshi.
UMliswa utsho lamazwi emhlanganweni awenze labezindaba esola ukwenza kukamkamongameli unkosikazi Grace Mugabe, osengohlala ehlambaza lokululaza mahlayana inkokheli ye Zanu PF kanye lezikuhulumende, osekufike kusibanga esibi nxa kukhangelwa inkulumo yakhe emhlanganweni owenzelwe e Mazowe, eChiweshe ngeviki edluleyo.
Lokhu kwenza uMliswa ethi ngokunye kwalokho osekuphazamise imizamo kahulumende,yokuthuthukisa umnotho welizwe, abalemali zabo besesaba ukuzasungula amabhizimusi eZimbabwe ngoba bengasamthembi uhulumende weZanu PF.
"Le kungasi ndaba yokuhlekisa ngayo,ngoba inkulu,isimo senqondo yakhe sesibangele ukutshabalala komnotho,usutshabalele umnotho welizwe. Lezo zinqumo azithathayo,sezigcone uzulu weZimbabwe jikelele,sezigcone njalo lomongameli R G Mugabe.Kusobala ukuba umongameli engasalewo amandla wokweluleka umkakhe".
Ingcwethi kwezombusazwe, umnumzana Stephen Sibanda uthi uyavumelana loMliswa.
"Ngathi usedlulise amalawulo,nguye oseqhatsha njalo nguye osexotsha,ufundile kodwa kafundanga ngenye indlela.Weqele esikhundleni esingasi sakhe,uyazisebenzisa yedwa,kasetshenziswa".
Njalo ngingathi umongameli welizwe kase that active ngesilungu,ukubana akhokhele leli lizwe,so umkakhe nguye osebona,no,ngeke ngekele umkami elala emsebenzini,yekela ngeqele esikhundleni sakhe.
USibanda laye usole kakhulu ukuhlambazwa emphakathini komsekeli kamongameli umnumzana Emmerson Munangagwa ethi osekusenziwa ngumka mongameli yikutheza olulenkume.
"Hayi,okwamanye akusela buqili,uMugabe usehlulekile ukuba abambanise ibandla lakhe leZanu Pf,lidabukile,licezukile ngaphakathi ibandla leZanu PF".Abantu abanje ngo Vice President uMunangagwa laba,ngabantu abalwa impi njalo bale history njalo ngabantu abale history yokubulala,imbali yokubulala,so balakho ukumenza anything. Ukuthula akwenzileyo lokhuyana akutsho ukubana wemukelile ukuthethiswa akade ekwenza.Ngenye indlela kutsho ukuthi uyohlala phansi,uyabuya lamanye ama stratergy amatsha.
Abenhlanganiso ye YARD kanye lengcwethi kwezombusazwe bathi osekumele kwenziwe yikuba umongameli Robert Mugabe asuke esikhundleni, isikhathi sisesekhona njalo esasalabantu abamthandayo ngoba okwenzakalayo kuveza ukuba usehlulekile njalo usekhulile.
Inengi lisole njalo ukwenza kwamapholisa, atshaye abakade befola belubhekise edale lephalamende ukuyanikeza incwadi yezikhalalzo phezu kwesimo somnotho esingasihle.
Lokhu kufola bekuqoqwe ngabenhlanganiso ye Zimbabwe Activists Alliance (ZAA) bemanyene lezinye inhlanganiso ngenjongo yokutshengisa ukukhonona kwabo phezu kwesimo somnotho elizweni.
