Umpathintambo wezempilakahle uDr David Parirenyatwa ukhuthaza izizalwane zeZimbabwe ukuthi zike zime ukwethekelela emazweni angentshonalanga kwezwekazi leAfrica ezigoqela ele Nigeria, Liberia, Siera Leone kanye leGuinea angamazwe ahlaselwe ngumkhuhlane ongelaphekiyo owe Ebola.
UParirenyatwa utshele iStudio Seven ukuthi lanxa eleZimbabwe lizimisele ukulwisana lalumkhuhlane kuqakathekile ukuthi nxa kusenzakala abantu bake bame ukwethekelela emazweni abhekane lohlupho lokuqhamuka kwalumkhuhlane kuze kufike isikhathi sokuthi usutholelwe imithi yokuwelapha.
Okwamanje inhlanganiso yomanyano wamazwe womhlaba ebona ngezempilakahle, eye World Health Organisation ibika ukuba kulabantu abedlula inkulungwane eyodwa-1,200 asebebulewe yilumkhuhlane emazweni aweWest Africa, kulabantu abedlula inkulungwane ezimbili-2,240 asebephathwe yilu mkhuhlane. I-WHO ithi kayiboni leli nani lisehla esikhathi esifitshane esilandelayo ngoba imithi ingakatholakali engemisa ukumemetheka kwawo.