lzakhamuzi zakoBulawayo zithi ubhubhane lweCOVID-19 luguqule impilo yabo.
Bathi baphila nzima loba kulabanye abathi kumele uzulu afunde ukulalela iziqondiso ezivela kwabezempilakahle mayelana lomkhuhlane lo.
Lokhu umemetheka umkhuhlane weCOVID-19 eZimbabwe loba bebalutshwana ababulawa yiwo kulez’insuku. Uhlangothi lwezempilakahle lubika ukuba akulamuntu obulewe ngumkhuhlane lo izolo elizweni.
Kulabantu abangamatshumi amathathu lanhlanu – 35 abahlolwe batholakala belegciwane leCOVID-19 ngoMgqibelo.
Umkhuhlane lo sowabulala abedlula inkulungwane ezine lengxenye – 4,696 eZimbabwe kusukela nyakenye. Abedlula izigidi ezintathu lengxenye – 3.5 milion sebahlatshwa ijekiseni yakuqala yokuzivikela kumkhuhlane weCOVID-19. Sebefika phose izigidi ezintathu – 2.7 million asebehlatshwe ijekiseni yesibili. Kusenzakala konke lokhu, abantu abanengi bathi sebephila nzima ngenxa yomkhuhlane weCOVID-19.
Ababanjwa belomkhuhlane lo bathi kumele uzulu alandele konke okwethulwa ngabezempilakahle. UNkosikazi Nomathemba Nhoro, ohlala eKhumalo koBulawayo owahlolwa watholakala eleCoronavirus, uthi abantu kumele balalele njalo baxoxe kabanzi ngeCOVID-19.
“Information yokuthi iCOVID kuyini njalo kumele senzeni isiphiwe njalo inengi in a lot of places. Ngibona okumele sikufunde yikulalela. Abantu sadalwa singafuni ukulalela esikufundiswayo njenge zimuli kuqakathekile ukuthi lathi sixoxe ngeCOVID abalembuzo babuze.”
UNkosikazi Nhoro, osephephile kumkhuhlane weCOVID-19, wengeze esithi odokotela balakho ukuhlanganisa izimuli baxoxe ngomkhuhlane lo.
“Ngilabangane le muli abangodokotela abasincedisayo sayenza izoom meeting udokotela wethu wasichasisela sibuza lemibuzo. lts important ukuthi siyedinga information ebantwini abalolwazi abakufundeleyo.
Osakhulayo uMelusi Mzinja ohlala eNkulumane uthi inengi labasakhulayo balahlekelwe yikusasa labo.
“ICOVID-19 isifake ezinhlungwini ezinengi, ama online lessons abefuna idata. Ukungahambi kwethu esikolo kwenze ukuthi abanye bewele kuzidakamizwa amankazana amanye ezithwala emancane. lCovid 19 isenzele impilo yabanzima kakhulu.”
UMnu. Thomas Ndlovu ohlala eTshabalala uthi intengo yempahla isikhuphuke kakhulu okwenzwa abantu bengenelisi ukuziphilisa.
“ICOVID itshintshe izinto ezinengi, izinto sezidula kakhulu akusathengeki. Abantu abasebenzayo general abaphansi akukho ohola imali efika kubo$30 000. Lamabhasi kaZupco akhwela now and then ngemali esiziholayo akusahambisani konke kuyakhwela kodwa isalary isala iphansi.”
Uhlangothi lwezempilakahle lubika ukuba kusiyaphela usuku lwayizolo besokulabantu abedlula inkulungwane ezilikhulu lamatshumi amathathu – 133,428 asebahlolwa kusukela nyakenye batholakala belegcikwane leCOVID-19.