Liviki kuhlelo oluphatha indaba zabeZimbabwe asebehlala kwamanye amazwe sikwele Bhilithani lapho esixoxa ngohlelo lomkhosi obuthanisa abakumsebenzi wokulibazisa uzulu oqoqwa yizizalwane lezi esigabeni seKent eNgilandi, owe MPORIRO FEST.
Umgcicihlalo wenhlanganiso ye Bantu Intergration Through Art-BITTA eyiyo eqoqa lumkhosi weMporiro Fest, uDumisani Gumpo utshele iStudio Seven ukuthi lolu hlelo lwasungulwa ngenhloso yokufundisana lokulimukisana ngemikhuhlane ethile esidibana layo empilweni efana labo High Blood Pressure lowengculaza.
'Lonyaka lumkhosi ubugxile ekulimukiseni uzulu ngokuvimba ukuthelelanwa kwegcikwane elibangela ingculaza phansi kwendikimba yenhlanganiso yomanyano wamazwe womhlaba ethi “GETTING DOWN TO ZERO”.
"Sikwenzile ke lokhu ngokulibazisa uzulu ngemiculo lemidlalo ethile kodwa siphosela amacebo lapha lalaphaya emiculweni kanye lembiko ethile, sichasisa ngengozi yalumkhuhlane".
"Sakubona ukuthi kungaba nzima ukuphongubuthanisa abantu njengomhlangano wemfundiso owe workshop kodwa abantu baza ngobunengi lapho abayabe belibaziswa ngomculo kanye lemidlalo yokulingisa besidla bekholisa kodwa ngasikhathi sinye bethola imfundiso kule iFestival.” utshonjalo uGumpo
“Eminyakeni emibili edluleyo umhlonitshwa emkhosini weMporiro Fest bekungumqondisi kugatsha lwezamasiko ezimbabwe umnumzana Nicholas Moyo kanye loMayor wedolobho leCanterbury uNkosikazi ophiwe isicoco sokuba yiKosazana yase Africa, “Princess of Africa”. Lonyaka bekumele kuze umculi olodumo njalo eyimbongi uAlbert Nyathi kodwa kasenelisanga ukuya khona ngenxa yezinye imbambeko eZimbabwe.
Ngaphandle kokwabelana amacebo ngemikhuhlane ethize lokulibazisana uGumpo uthi bavame ukutshayela ihlombe abasebenza lozulu ngemisebenzi yabo emihle ngokubapha inhlonipho yezicoco lemivuzo.
Lonyaka abathole imivuzo bagoqela iqembu lomculo elibunjwa yizizalwane zeZimbabwe ezihlala khonale eNgilande ele Royal Destiny, uDokotela Bright Chareka osebenza kakhulu nyakenye ephathisa omunye wabomdlalo wokulingisa olodumo uPretty Xaba ukuthi athole uncedo lokwelatshwa kwele India, wabuthanisa imali wampelekezela esibhedlela, lalapho esetshonile waphelekezela njalo isidumbu sesibuyela ekhaya ukuyangcwatshwa.
Ube jabule okwamagama okaGumpo ngokuphumelela komdlalo wabo weMporiro Fest 2015 walonyaka esithi balethemba lokuthi owomnyaka ozayo uzaphumelela ukwedlula lonyaka ngoba abantu bekhanya bewusekela okwamagama.
