Umkhokheli welinye lamacele ebandla eliphikisayo eleCitizens Coalition for Change uMnu. Jameson Timba labanye bakhe abangamatshumi amathathu-30 bafunyanwe namuhla ngumthethwandaba kamantshi belecala lokuqhuba umhlangano ongekho emthethweni.
Abantu laba besebehlale esitokisini eRemand Prison okwenyanga ezinhlanu.
Abanye abakubandla leCCC abangamatshumi amathathu lanhlanu, 35, ababotshwa loMnu. Timba batholakale bemsulwa.
Babotshwa mhlaka 16 ngoNhlangula besendlini kaMnu. Timba eHarare besithi bananza usuku lweDay of the African Child. Umantshi uMnu. Collet Ncube uthe uMnu. Timba labanye bakhe batshaya amapholisa balimaza amabili njalo bagongoda imota yawo. Uthe bazagwetshwa ngeviki ezayo.
Kulababili abatholakale belecala kodwa okuthiwa babengekho ngesikhathi icala leli lisenzakala. Umantshi ubesahlolisisa udaba lolu ngesikhathi iStudio 7 isiya emoyeni. Amaqgwetha kaMnu. Timba labanye bakhe achasise ngokwenzakale emthethwandaba. Omunye wabo nguMnu. Webster Jiti osebenzelana lenhlanganiso yeZimbabwe Lawyers for Human Rights.
'' Abangu 30 abagoqela uMnu Timba batholakale belecala kuthi abangu 35 batholakale bengelacala ngobababengekho emzin ka Timba ngesikhathi kusenzakala icala,'' kutsho uJiti.
UMnu. Jiti uqhubeke esithi kuyadanisa ukuba uTimba lamanye amalunga eCCC abotshwa lawo sebehlale eRemand Prison isikhathi eside.
''Kubuhlungu ukuba kulabatholakale bengelacala ngemva kokuhlala isikhathi remand''
Olwela amalungelo oluntu obesemthethwandaba uMnu. Peter Ncube uthi okuzwisa ubuhlungu yikuba abanye batholakale bengelacala ngemva kokuhlala isikhathi eside ejele.
'' Lokhu kwenza ukuba kube nzima ukwethemba amdale ethu lokuba wonke umuntu azibone ekhululekile kwelakithi,'' kutsho uNcube.
Kolunye udaba, owayengummeli weMkoba North edale lephalamende, uMnu Amos Chibaya, namuhla uphiwe imvumo yokubhadala isibambiso sebail lidale leHigh Court.
Wetheswa icala lokuthi wahamba ngoNtulikazi lonyaka emthethwandaba ukuyadingisisa okwenzakala kuMnu. Timba labanye bakhe. Amapholisa athi akwenzayo yikukhuthaza ukuthi kubelodlakela.
Kolunye njalo udaba, uNkosazana Mary Mubaiwa, owayelikhosikazi lomsekeli kamongameli, uMnu. Constantino Chiwenga, kwaliwe isicelo sakhe lidale likamantshi ukuba kulahlwe udaba alwetheswayo esithi sokuthethe isikhathi eside ukuba luthoniswe.
Idale leli lithe kumele aphenduke ekuqaleni kwenyanga ezayo lisithi ukugula kwakhe lokungafuni ukuma edale kungaphazamisa amalungelo kaMnu. Chiwenga. Wetheswa icala lokuzama ukubulala uMnu. Chiwenga.
Forum