Umahluli womthethwandaba ophezulu ngoMvulo udlulisele phambili isinqumo kudaba olwakhwezwa ngabalwela ilungelo loluntu bephikisa inyathelo likahulumende elokhuthi kumiswe inhlelo zokhetho ngendlela yokwenqabela ukumemetheka kweCOVID 19.
Igqwetha lenhlanganiso yeZimbabwe Lawyers for Human Rights, uMnu. Tendai Biti njalo engowebandla leMDC Alliance utshele lumthethwandaba ukuthi ukumiswa kokhetho yikwephula isisekelo sombuso kanye lelungelo loluntu ngoba lungaqhutshwa kulandelwa iziqondiso zokuvikela i-COVID 19.
Kusenjalo, umkhokheli wabatsha kubandla leMDC Alliance uMnu.Obey Tererai Sithole ukhululwe ngoMvulo ngenhlawulo yemali yesibambiso eye bail ngemva kokuhlala entolongweni phose inyanga eyodwa esetheswa icala lokubangela ukungahlaliseki elizweni.
UMnu. Sithole uhlawuliswe inkulungwane ezinhlanu zamadola 5 thousand RTGS eye bail njalo igqwetha elimelayo uMnu. Obey Shava uthi bazaphindela emthethwandaba kunsuku ezilandelayo lapho okuzathethwa icala aletheswayo.
Isikhulumeli Sebandla leMDC Alliance eMatabeleland South uMnu. Ntando Ndlela uthi kuyadanisa ukuthi amalunga ebandla lakhe ayabotshwa mahlayana njalo labo basenza beqaphele.
