Owayengukaputeni weqembu lenguqu ele Dynamos kanye leqembu elimela iZimbabwe elama Warriors, uMisheck Chidzambwa kasekho.
UMisheck Chidzambwa owake eabizwa ngesibongo sokuthi Misheck Marimo, owacina esiba ngumqeqeshi weqembu lesizwe eleZimbabwe Warriors, ngemva kokudlalela iDeMbare, utshone ngoLwesine ebusuku ngemva kokugula okwesikhathi eside.
UChidzambwa ube ngukaputeni weqembu lakuqala lesizwe elema Warriors eliphakamise inkezo ngemva kokuba leliqembu linqobe kumncintiswano we CECAFA Senior Challenge Cup ngomnyaka ka 1985.
Uphinde njalo waphakamisa inkezo ye COSAFA esengumqeqetshi weqembu lama Warriors ngomnyaka ka 2000.
Umgcinisihlalo wenhlanganiso yentathelizindaba zemidlalo emhlubulweni wezansi kwelizwe, eye Sport Journalists Association (Spoja SR) uLovemore Dube uthi ilizwe lilahlekelwe kakhulu ngokubhubha kuka Chidzambwa.
“Umdlalo wenguqu ulahlekelwe yingcintshi ebivimba okukhulu okwamagama. Ume emuva kuqembu le Dynamos, wama kuqembu le Zimbabwe.
Ube ngumqeqetshi, wanqoba. Umsebenzi awenzileyo uyabukeka. Sithi lala kuhle, lala ngokuthula. Uphumulile mfowethu,” kutsho uDube.
UMisheck Chidzambwa ubeseleminyaka engamatshumi ayisithupha lesithupha eyokuzalwa.
Ukufa kwakhe kuza kungensuku ngaki kwedlule emhlabeni umdlali owakhethwa ukuba nguye owadlala kuhle ukwedlula abanye bonke ngomnyaka ilizwe elithole ngawo uzibuse ngo 1980, uDavid Mandigora, kanye lomqeqetshi owayezibambe esidukwini ngo 1985 lapho ama Warriors athatha khona inkezo ye CECAFA, uMick Poole.
Inhlanganiso ebona ngokuqhutshwa komdlalo wenguqu elizweni eye Zimbabwe Football Association, iZifa ngamafitshane, ikhuphe umbiko iduduza imuli yako Chidzambwa, obengumfowabo ka Sunday Chidzambwa laye owayengukaputeni waphinda waba ngumqeqetshi weqembu le Dynamos kanye leqembu lesizwe elama Warriors.
Umuyi uqeqetshe amaqembu abalisa ele Chapungu kanye lele Blue Ribbon ngesikhathi esengumqeqetshi.