Abaphila ngokuthengisa koBulawayo bakhala ngokukhahlanyezwa lokuphanjaniselwa ibhizimisi libandla elibusayo eleZANU PF ngenxa yomkhosi wabasakhulayo walelo bandla okhona ngoMgqibelo koBulawayo.
Abathengisayo laba bathi baziswe ukuthi basuke koSekusile emini yangoLwesihlanu, ukwenzela ukulungeselela ukuza kukamongameli Robert Mugabe ozazovula i-Information Centre eposo yakoSekusile.
UNkosikazi Mabel Mhlanga, othengisa impahla etshiyeneyo koSekusile, uthe lokhu kuzakwenza balahlekwe yimali kakhulu ngoba baphila ngokuthengisa.
Omunye njalo othengisa koSekusile, uMnu. Nkosana Ncube, uthe kuyadanisa kakhulu okwenziwa yileli bandla ngoba kuyilo elathembisa imisebenzi eminengi kodwa lokhe ingabonakali njalo nxa uzulu esezama ukuziphilisa sedudulwa ngamapholisa.
IPoso yaseNkulumane ilungiswe ukuze kube lendawo yokutholelwa ulwazi oluthile eyeCommunity Information Centre ezavulwa nguMugabe okusemthethweni.
UMnu. Aleck Maphosa, olwelwa amalungelo oluntu, uthe kuyadanisa ukubona umongameli welizwe ezovula indawo enjenge community information center kulokuthi kusungulwe inhlelo ezinkulu ezitholisa uzulu imisebenzi.
NgoLwesihlanu emini koBulawayo abatsha abeZANU PF bebefola bekhatshwe ngabeqembu lomculo elabalinda emajele emizameni yokuhuga abantu ukuze baye emkhosini wakusasa. Ihlekana labantu libonakale lilabo eCity Hall.
Imikhosi yabasakhulayo beZanu-PF ikhokhelwa nguMugabe isiyenziwe ezigabeni eziyitshiyangalo mbili, sekusele koBulawayo le Harare. Inkokheli yabatsha yeZanu-PF koBulawayo ibikwa yabumba ikomidi yokudinga inkulungwane ezingamatshumi amanhlanu amadola - $50,000 yokusebenzisa kulumkhosi.
