Inhlanganiso ezilwela ilungelo loluntu zikhuthazwa ukuba ziqakathekise iziqondiso zemithetho yokulinganiswa kwamathuba phakathi kwabesifazane lebesilisa lapho isikulungisiswa ukuze ihambelane lesisekelo sombuso esitsha. Ngakwelakhe icele uhulumende ugcizelele ukuzinikela kwakhe ukulutshutshisa uhlelo lokulungisisa isisekelo sombuso esitsha ukuze imithetho ekhona elizweni isilandele.
Bebecula lokugiya abesifazane bequla le Mbare Chimurenga ekufikeni kosaphethe isikhundla sikamongameli uNkosikazi Joice Mujuru obengumhlonitshwa emhlanganweni owenzelwe e Harare International Conference Centre ngoLwesine. Lumhlangano ungenwe zinkokheli zenhlangothi ezitshiyeneyo zempilo, ezigoqela ezenhlanganiso zomanyano wamazwe womhlaba kanye labesifazane beHarare inengi labo kungabebandla elibusayo leZanu PF.
Emazwini akhe wokusungula lumhlangano, wokubonisana phezu kokungenziwa ngesikhathi uhulumende elungisisa imithetho ukuze ihambelane lesisekelo esitsha sombuso, uNkosikazi Mujuru ugcizelele ukuqakatheka kokulandela ngokugcweleyo imithetho lapho isilungiswa ukuthi ihambelane lesisekelo sombuso esitsha wathi kuyinto edanisayo ukuba bakhona abavame ukudonsela muva imisebenzi yokulinganiswa kwamathuba phakathi kwabesilisa labesifazane kungakhathalekile ukuba ngowesifazane loba ngowesilisa.
Wakhuthaza abesifazane ukuba bangazikhangeleli phansi ethi ngoba owesifazane angathuthuka lesizwe siyathuthuka. Wengeze ethi isitha esikhulu kudaba lokuthuthukiswa kwabesifazane kuyibona abesifazane ngokwabo njengoba inengi labo liphatheka kumisebenzi edonsela phansi labo ababonakala bezinikele ukuzithuthukisa lokuthuthukisa abanye.
Lokhu kugcizelelwe ngumphathintambo wendaba zabesifazane, okhuthaze inkokheli yonke ekungatsha zikahulumende ukuba ilandele imithetho lapho isilungisiwe yahambelana lesisekelo sombuso esitsha.
Bakhona abavele emazweni abalisa ele Kenya lele South Africa abazephathisana lenkokheli zakuleli phezu kuhlelo lokulungisiswa kwemithetho eqondene lokulinganiswa kwamathuba phakathi kwabesilisa labesifazane, kusisekelo esitsha sombuso olwenziwa phansi kwesihloko esithi ‘Making the constitution work for women ’.
Enye ingcwethi kwezemithetho eKenya unkosikazi Catherine Muyeka Mumma utshele lumhlangano ukuba sikhona isidingo sokulandela ngokugcweleyo okumunyethwe yisisekelo sombuso esitsha ukuze kungabi yimithetho engasebenziyo ukusiza labo okumele ibasize.
Kwathi unkosikazi Matshilo Motsei wakwele South Africa osebenzelana lenhlanganiso ye Hivos kanye leye Zimwith kuleli laye wakugcizelela lokho.
Wengeza ethi imithetho kuphela ingayikuletha inguquko phezu kokulinganiswa kwamathub la kodwa kudinga ukusebenza kanzima kwabesifazana ukuze kufezeke lokho.
Uthi uMotsei inking eyenza abesifazane bangaze bathuthuka ngokugcweleyo yikuswelakala kokusebenza ndawonye phakathi kwabo okusuka kudlulisele phambili umbono othi akukho okungeneliswa ngowesifazane, yonke imisebenzi yobukhokheli kungeyabesilisa njengalokho okutshiwo lisiko. Wathi enye inking yikuthi ziyeyiswa lezindaba zokulinganiswa kwamathuba phakathi kwabesilisa labesifazane. Isibonelo salokho u Motsei uthi yindlela imali yokusekela lezinhlelo esilela ngayo lanxa ohulumende bamazwe ezwekazi leAfrica behlezi bethi bazinikele ukukwenze lokho.
Lumhlangano owenziwe ngoncedo lwenhlanganiso ezibalisa eye UNDP, UNICEF, UNAIDS kanye le UN Women ungenwe zinkokheli zengatsha zikahulumende, inkokheli enhlanganisweni ezilwela ilungelo loluntu ikakhulu abesifazane, amalunmga edale lephalamende yabadala kanye leyabantwana, izifundi zeMorgan Zintec Teachers College, abantwana besikolo se Heritage College kanye labesifazane baseHarare.