Umhlangano wedale lePolitiburo ele Zanu PF oqalisengoLwesihlanu emini uqhubekele phambili njalo ubukhangelelwe ukuphuma lezinqumo phezu kokwethulwe nguNkosikazi Grace Mugabe othi umsekeli kamongameli uNkosikazi Joice Mujuru kumele atshiye umsebenzi.
Okunye njalo okukhanya kuzaphathwa lukhetho lweziphathamandla zebandla emhlanganweni omkhulu waleli bandla oweCongress ozakwenziwa ngoLwezi leziqondiso zokuthi ngobani okumele bancintise ezikhundleni ziphi ebandleni leli.
Leli dale likhangelelwe njalo ukuhluza ukulwisana osokudabule ibandla leli phakathi abanye belandela uNkosikazi Mujuru abanye njalo basekela umphathintambo wezemithetho uMnu. Emmerson Mnangagwa. Ababili laba bacatshangelwa ukuthi bafuna ukungena esikhundleni sikaMongameli Robert Mugabe oseluphele.
Kodwa uNkosikazi Mujuru loMnangagwa bathi kabalasifiso sokuthatha lesi sikhundla. Okwamanje uNkosikazi Mugabe okhanya esekela icele elikhokhelwa nguMnangagwa ufisa ukuthi uMujuru atshiye umsebenzi njengoba ecabangela ukuthi wenza ubungilimbani kwezemali njalo ufuna ukuhluthuna isikhundla sika Mugabe. Abasekela uMujuru bathi uNkosikazi Mugabe ukhuluma angakwaziyo.
Ukuhlaziya okwenzakale emhlanganweni wePolitiburo, uGibbs Dube weStudio 7 uxoxe lomsekeli webandla leli, uMnu. Morris Ngwenya oyingcwethi njalo yezombusazwe.
UGibbs uphinde waxoxa njalo ngodaba lunye loMnu. Bekezela Maduma ingcwethi kwezombusazwe ezimele yodwa.
