Umhlangano omkhulu oweUS-Africa Leaders Summit ugqhitshwe izolo eWashington DC inkokheli yezwekazi leAfrica isithi izazimisela ukuthuthukisa abasakhulayo, ukunqoba indlala lomkhuhlane weEbola kanye lokwenza kubelokukhululeka kukazulu.
Umgcinisihlalo womhlangano lo okade emele inkokheli yeAfrica, uMongamelo Mohamed Ould Abdel Azizi weMauritania, wethule izinqumo lezi wagcizelele ngokuthi inkokheli yeAfrica izimisele lokuvuselela ubudlelwano phakathi kwamazwe abo ukwenzela ukuthuthukisa umnotho weAfrica.
UAbdel Azizi uthe kuyabukeka ukuthi eleMelika lidinge imali efika amabillion angamatshumi amathathu lesikhombisa – $37 billion – ngesikhathi esifitshane somhlangano lo yokuncedisa ukuthuthukisa izwekazi leAfrica.
Uphinde wathi inkokheli yeAfrica ivumelane ukuthi kumele uhlelo lokudingela uzulu umlilo kagetsi olwePower Africa luqhubekele phambili kanye lohlelo lokuthengiselana leMelika ngaphansi komthethe weAfrican Growth and Opportunity Act.
Inkokheli le, efika amatshumi amane lesikhombisa – 47, ithethe lesinqumo sokuthi kumele kuncediswe njalo abasakhulayo abafuna ukuvula amabhizimusi. Abasakhulayo laba baqoqela labo abakuhlelo lweMandela Washington Fellowship for Young African Leaders. Kulezizalwane zeZimbabwe ezingamatshumi amathathu – 30 – kuhlelo lolu.
Ekhuluma lentathelizindaba esethula izinqumo lokunye okufezwe emhlanganweni lo, uMongameli Barack Obama uthe kumele abasakhulayo baqakathekiswe njengoba beyinkokheli yakusasa.
Uphinde wathi kumele kubelenguquko ebalulekileyo emazweni evumela lentathelizindaba ukuthi ziqhube umsebenzi wazo kungelamigoqo efakwe nguhulumende.
Umkakhe, uMichelle Obama, laye uthe kumele abantwana abangamankazana bafundiswe kakhulu ukwenzela ukuthi bazimele bodwa empilweni.
Ukuze sihlaziye okwenzakale emhlanganweni lo lezinqumo ezithethwe yinkokheli yezwekazi leAfrica, sixoxe loMnu. Nkululeko Sibanda ingcwethi kwezombusazwe loMnu. Morris Ngwenya okubandla leZanu PF njalo oyingcwethi kwezombusazwe.
