Abenhlanganiso eziququzela amalungelo abesifazana ezehlukeneyo abavele ezigabeni zonke zelizwe, bathe gwaqa emhlanganweni wamalanga amabili, wokubonisana phezu kokungenziwa ukuthuthukisa inane labo eliphatheka ngokugcweleyo kwezomnotho.
Ingoma ka Oliver Mtukudzi ethi “Tozeza Baba”, iqunswe ukujabulisa abesifazane behlaba ikhefu emhlanganweni owenzelwa eCresta Churchill koBulawayo phansi kwesihloko esithi “ Women, Money and Politics”, oqoqwe ngabenhlanganiso ye Women’s Institute, bendawonye labe Women’s Coalition of Zimbabwe, Women in Politics Trust, Women Institute for Leadership Devevelopment kanye le Southern Western Region Gender Network.
Lumhlangano wokubonisana phezu kokungenziwa ukuthuthukisa abesifazane, inkhokheli kulezinhlanganiso ezilwela amalungelo abesifazane, zithi zize ngemva kokunanzelela ukuba lokhe busanda ubuyanga kwabesifazane lanxa kuyibo abalinani eliphezulu ngesilinganiso sokungamatshumi amahlanu lambili ekhulwini-52%.
Okudanisayo abesifazane laba bathi bakulesi simo sokuyiminyaka engamatshumi amathathu lanhlanu ilizwe lathola uzibuse, belokhe besalela muva kwezokuthuthukiswa komnotho, lanxa uhulumende ehlezi ehlabela ingoma yokuthuthukisa loluhlangothi, yabekwa imithetho kwaze kwabunjwa logatsha lwabesifazane kodwa singaguquki leso simo.
Umkhokheli wenhlanganiso ye WILD, unkosazana Samukeliso Khumalo uveze ukuba kungalesi sizatho sokunanzelela ukuba kabananzwa abesifazane elizweni.
UProffesor Rudo Gaidzanwa ngomunye wabaze mhlanganweni lo, wokubonisana ngezinye zezikhexe ezikhona kuloluhambo lokuzama ukuthuthukisa abesifazane lokuthi zingalungisiswa njani.
Ukhuthaze abesifazane ukuba behlukane lomkhuba wokutshaphaza imali mahlayana, bengalalisi inkophe benothisa abanye kuveza uProffessor Gaidzanwa.
Unkosazana Virginia Phiri, ungumlobi njalo ngowesifazane owafundela umsebenzi wokuqoqa ingwalo zemali i-Accoutant, asewuqhube okweminyaka engamatshumi amathathu lambili.
Bavele bahlezi bezisebenzela abesifazane beqhuba imisebenzi embalwa utsho njalo unkosazana Phiri ethi inkinga isuka ibe khona lapho sebefuna ukufinyelela lokho okubaphathisa ukukhula kwaleyo misebenzi, befuna ukuyiqhelisa kube ngamabhizimusi amakhulu.
Makukhangelwe lokho okwenza owesifazane abe lokhe ekhala ngokungathuthukiswa kwamabhizimusi abo, kungaba yimithetho yelizwe loba eyamabhanga uPhiri athi yalungiswa kukhangelwa abesilisa kuphela.
Abangene lumhlangano bavumelana ukuba kumele kukhangelisiswe okuvimba abesifazane laba, bazwisisa ukuba imali isempahlaneni abalayo okufana lezifuyo kodwa inkinga kuyinotho ekhangelwa ngokuthi ngekababa hatshi eyabo bonke kumbe ekamama yedwa. Bathi lokhu yikho okumele kulungisiswe elizweni elizithi lisebenzela ukulinganisa amathuba abesilisa labesifazana.