Imidlalo yenkezo yeChibuku Super Cup ingena kusigaba se semi – final kulimpelaviki enkundleni yeMandava eZvishavane ikanti esigodlweni iHarare amalunga enhlanganiso ye Zifa akhangelelwe ukungena umhlangano olakho ukubumba ikusasa yomdlalo wenguqu kwele Zimbabwe.
NgoMgqibelo amakhansila abumba inkokheli yenhlanganiso yeZifa akhangelelwe ukungena umhlangano oqakathekileyo esigodlweni iHarare.
Emhlanganweni lo kulapho okuzavela khona ukuba umongameli wenhlanganiso ye Zifa uCuthbert Dube kanye labanye bakhe bazaqhubekela phambili bekhokhela linhlanganiso loba hatshi njengoba amakhansila eke azama ukubatshayisa unyawo esikhathini esedluleyo basinda sekungele inhlanganiso ye Fifa.
Isiphathamandla senhlanganiso ye Zifa uJonathan Mashingaidze ubikwa eke wazama ukuba ecele kunhlanganiso yeFifa ukuba lumhlangano udluliselwe phambili kodwa limizamo kayiphumelelanga.
UMashingaidze lo Dube basolwa ngamakhansila amele izigaba ezehlukeneyo zelizwe leZimbabwe ngendlela abaphethe ngayo umdlalo wenguqu elizweni njengoba sikhuluma kunje ilizwe laxotshwa ukuphatheka kumkhankaso wokudinga amaqembu azadlala kumidlalo yezizwe zomhlaba.
Umphathintambo wezemidlalo lokuzilibazisa uMakhosini Hlongwane ukhangelelwe ukungena lumhlangano ozangenwa njalo langabameli beFifa kulumhlubulo wezwekazi leAfrica.
...........................................................
Kusenjalo uHlongwane uphathise iqembu labesifazane elimela ilizwe emdlalweni wenguqu ukuba liyedlala leqembu elimela ilizwe le Cameroon kusasa kumkhankaso wokudinga amaqembu azaphatheka kumncintiswano wama Olympics ngomnyaka ozayo.
Leliqembu beselisengozini yokwehluleka ukuphapha liye eCameroon kwathi inkokheli zomdlalo wenguqu kucele labesifazane selikhalaze kuHlongwane umphathintambo lo wagijigijima wahlangisa izimali njalo leliqembu lisuke namhla ekuseni lilubhekise eCameroon.
Kolunye udaba olumayelana lomdlalo wenguqu umncintiswano wenkezo ye Chibuku Super Cup ungena kusigaba se semi-final kusasa enkundleni ye Mandava lapho iqembu le Harare City elizadibana khona lele ZPC Kariba kuthi ngeSonto iqembu le Dynamos lizadlala lele Chapungu khona njalo enkundleni ye Mandava.
...................................................................................
Sikhangele umdlalo kakhilikithi; iqembu elimela ilizwe emdlalweni kakhilikithi kusasa lizadibana leqembu le Pakistan emdlalweni wesibili owohlobo lwe One Day International enkundleni ye Harare Sports Club.
Iqembu le Zimbabwe linqotshwe emdlalweni wakuqala ngama runs alikhulu lamatshumi amathathu lanye (131) ngoLwesine njalo kuzamele livikelwe ukunqotshwa kusasa ngoba lingadliwa kuyabe kusitsho ukuba impumela yomdlalo owokucina phakathi kwalawa maqembu iyabe ingasaqakathekanga ngoba iPakistan iyabe isinqobe kumidlalo emibili phakathi kwemithathu.
