Abasebenza ezabelweni kuhulumende bathi ukuswelakala kwempahla yokusebenzisa, ukungathembeki kanye lokungazi umsebenzi kwenza kubenzima ukuthi baqhube umsebenzi ngendlela esuthisa uzulu ngesikhathi uhulumende engabaza ukusa amandla okuzibusa kuzabelo.
Okhansila kanye lezisebenzi zikahulumende ezabelweni kuzigaba zeMatabeleland bebethe gwaqa koBulawayo ngoLwesihlanu emhlanganweni omkhulu oweLocal Governance Conference, obizwe yinhlanganiso ye Habakkuk Trust ukuzahlafuna udaba lokusebenza kwenkokheli yezabelo elizweni.
Inkokheli lezi zithi ukusebenza kwazo kwenqatshelwa yikuthi azilawo amandla okuthatha izinqumo zingela mvumo evela kuhulumende welizwe kanye lomphathintambo wokubuswa kwezabelo.
Okhansila laba bathi kunzima ukuthi baqhube inhlelo zokuthuthukisa izabelo ezifana lokulungisa imigwaqo, ukwakhiwa kwezikolo kanye lamakiliniki ngoba kumele bathole imvumo yokuphatha imisebenzi le ivela eHarare.
Baqhubeke besithi kwesinye isikhathi amakhansili asetshenzelwa ngabantu abangazi umsebenzi kumbe abangathembekanga abayabe belobudlelwano lebandla elibusayo okwenza kubenzima ukuthi baxotshwe emsebenzini lalapho bengaqhubi kuhle.
Ukhansila we Umzingwane uMnumzana Obert Ngwenya, uthi yena kukhona okunengi okungacacanga kusisekelo sombuso okumele kulungiswe ukuze kwaziwe ukuthi amandla enkokheli zezabelo yilawa akahulumende esigodlweni yilawana. Uthi kulusizi ukuthi inhlanganiso yeCOPAC eyaphatha umsebenzi wesisekelo sombuso seyachitheka yatshiya izikhenxe osokumele zilungiswe angazi ukuthi zizalungiswa ngubani.
UDokotela Samukele Hadebe, obexoxisana lenkokheli lezi, uthi kuqakathekile ukuthi kukhulunyiswane ngendaba zokubuswa kwelizwe ukuze izabelo zithole amandla okuthatha izinqumo ezizagcwalisa izifiso zikazulu ezimsebenzelayo. Uthi kukhangelelwe ukuthi imithetho ezabekwa ukuthi izabelo zisebenze ngcono ikhuthaze ukuzimela kwezabelo kunotho zazo ukuze ziyisebenzise ingahuquluzwanga yasiwa esigodlweni kodwa isebenzele abantu bakuleyondawo.
Uqhubeke ethi ukwesaba okukhona ukuthi izabelo zibelamandla kuvela kuhulumende owesaba ukuphungula amandla akhe ebona angani ilizwe lizaswela ukubambana.
Okhulume emele iHabakkuk Trust, uMnumzana Khumbulani Maphosa, uthi babize inkokheli ezivela ezabelweni ukuze kuzoxoxiswana ngodaba lokubuswa kwezabelo kucubungulwe lobudlelwano obukhona phakathi kwezabelo lohulumende esigodlweni. Uthi nxa kukhangelwa ukubuswa kwezabelo lalapho kubekwa imithetho ezakusa amandla okubusa kuzabelo kumele kuqakathekiswe izifiso zikazulu onguye owathi uyawafuna lawamandla ukuze abelakho ukubona ukuthi inotho ekuzabelo iyasebenza ukuthuthukisa lezo zindawo ngazo zonke izikhathi. Uthi uzulu kadingi kuthathela uhulumende welizwe wonke amandla kodwa kuphela ukuwaphungula ikakhulu akamphathintambo walolugatsha ukuze abantu labo babelelizwi ekubusweni kwabo.
Inkokheli ezingene kulumhlangano zigoqela ezivela emangweni weNkayi, eTsholotsho, eGwanda, ePlumtree kanye lakuMzingwane kungokhansila kanye labosibalukhulu bamakhansili.