Isizalwane seZimbabwe abesidume kakhulu kwezomculo, ukuxhasa abaculi, ezokulingisa, kwezamasiko lezokuthwebula imifanekiso uBongani Nxumalo kasekho.
Abaculi beZimbabwe kweleMandebeleni, abezamasiko kanye lomphakathi bonke bathi bakhala ezimathonsi ngokubhubha kwaleli qhawe. UNxumalo ubhubhele eJohannesburg ngemva kokugula okwesikhatshana.
Behlelwe yifu elinyama abaculi beZimbabwe kweleSouth kulandela imfa kaBongani Nxumalo obesaziwa kakhulu ngokuncedisa abaculi emsebenzini wabo.
UNxumalo uzelwe ngo 1968 koBulawayo eZimbabwe wasesiya kweleSouth Africa. Laphake ufike waba yintatheli enguye obona ngokwethulwa kwephephandaba le The Homeless Talk eJohannesburg.
Qede lapho ubuye waphindela kwezomculo, ezokulingisa lakukho konke okwenziwa umuntu esebenzisa ithalenta lakhe. Liqembu lakhe elaBanqobi Bomhlaba elaculale ingoma ethi lubaba ulamanga.
Usuke lapho waqala ukusebenza lamaqembu abaculi atshiyeneyo ebasiza ngokuhlela amagigi, ukulungiselela imisebenzi yabo kanye lokucindezela amadlalade.
Usebenze lamaqembu aziwa kakhulu kwezomculo afana leNdolwane Super Sounds ngesikhathi besethula idlalade labo elithi
Umnumnzana Funeka Mpofu okhule loNxumalo uthi kwehle ifu elimnyama kwezomculo kweleMandebeleni.
“UBongani ubevele engumuntu ovele waqala ukuqina endabeni zearts esakhula. Ukuqale engena ngeKarate, esuka lapho wangena kwezomculo, wacula lamaqembu engingangeze ngiwabalise. Engingakutsho ngoBongani yikuthi singumdeni, singabangani, siyizihlobo and the public, silahlekelwe kakhulu,” kutsho uMpofu.
Umculi weZimbabwe owaziwayo kwezaboMaskandi uZinjaziyamluma uthi badane okwenhlanzi ezitshelwe ngamanzi.
“Silahlekelwe kakhulu ngubaba uNxumalo ebesisebenza laye kakhulu engumuntu othanda kakhulu umsebenzi wakhe njalo esondele kithi esikhuthaza njalo ukuthi, bafana! endimeni yomculo akukho lula ukungena kodwa impumelelo ikhona ma ungabe uzimisele futhi uzihloniphe wena uhloniphe umhlaba,” kutsho uZinjaziyamluma.
Okhokhela iqembu le Mbube eleMbizo Messengers uPhuthumane Cele yena uthi uNxumalo ubenguziphozonke.
“UBongani ngimazi kudala sihlangana ekuqembu Abanqobi Bomhlaba, egida ngendlela eyisimanga. Wabangumuntu okwazi ukubhala imidlalo, waba kwazi ukuba ngumuntu odlala estage, waba kwazi ukuba ngumuntu odlala nakumaTV. Ababukayo uhlelo okuthiwa Isibaya ubekhona. Kubuhlungu kithi,” kutsho uCele.
UMandla Khumalo laye ocula eqenjini leMbizo uthi uNxumalo uzahlala ekhunjulwa njengendoda ebingelamhobholo.
“Silesithombe sethu esiphumileyo kuDaily Sun. Wabuya uBongani wasishuta mahala wasinikeza saphumanje safundwa kumaphephandaba angazange asibhadalise uyabona ukuthi ngumoya omuhle ongakanani?” kutsho uKhumalo.
Umnewabo kamuyi uCoster Nxumalo uthi njengemuli balahlekelwe kakhulu kodwa babonga uzulu ngenhlonipho aseyikhombise umuyi.
Kutsho uNxumalo: “Impela siduduzekile. Sithanda ukuthi futhi sibonge sithi baqhubeke bekwenzela labanye khonalokhu abakwenzileyo, wonke amaqembu lawa azile kuye”
Omunye wabakhokhela inhlanganiso zomphakathi weZimbabwe kweleSouth Africa uMlungisi Tshabalala uthi isizwe sonke silahlekelwe.
“Kufe udiwo mpela lwamasi. Amacebo akithi angeke esafana lasekuqaleni uNxumalo esasekhona emhlabeni,” kutsho uTshabalala.
Isidumbu sikaNxumalo sikhangelelwe ukusuka kweleSouth Africa ngoLweSine ntambama sesilubhekise koBulawayo lapho azangcwatshelwa khona NgeSabatha.
