Umngcele wase Zimbabwe leBotswana osedolobheni lePlumtree uqale ngoLwesithathu uhlelo lokusebenza ungavalwa kuzekuyefika mhlaka 23 ngoMpalakazi.
Lokhu kwamukelwe ngenjabulo enkulu nguzulu ohamba phakathi kwele Zimbabwe leleBotswana esiyathenga impahla ethengisa.
Inengi labantu basuka koBulawayo besiyathenga impahla yabo edolobheni leFrancistown eBotswana bebalekela intengo ephezulu eZimbabwe.
Uhambo lolu balwenza bekhangele ukuthi baphenduka ngasuku lunye ukuze bengabi lendleko yokudinga okokuya lala khona bekhetha ukuyathenga bahle baphindele ngosuku olufanayo. Kodwa khathesi bakhala ngokuthi bachitha isikhathi esinengi besemgceleni.
UNkosikazi Sisa Nyathi uthe ngoLwesibili uqede amahola amanengi elinde ukuchapha esaya eBotswana langesikhathi esebuyela ekhaya.
Uthe ukuvulwa komngcele usuku lonke ungavalwa kuzasiza kakhulu ngekhefu leKhisimusi ngoba abantu bezahamba bekhululekile.
Uhlangothi olubona ngokungena lokuphuma kwabantu elizweni olwe-Immigration yase Botswana lwethulwe umbiko owazisa ngokuthi abasoze bavale kusukela ngoLwesithathu kusiya mhlaka 23 ngoMpalakazi ukwenzela ukuthi uzulu ahambe laloba yisiphi iskhathi ngekhefu njalo kuphunguleke abantu abachitha isikhathi eside belinde ukuchapha.
Uphenyo olwenziwe yistudio 7 luveze ukuba ubugwelegwele becorruption bebugcwele phakathi kwesiphithiphithi ebesisemgceleni njalo amapholisa abengekho ukuthi ancedise ukuqondisa uzulu.
