UMeya weHarare uMnu. Jacob Mapfume uthi kakaxotshiswa ekhansili nguMnu. Nelson Chamisa hatshi lokhu okukhulunywa ngabantu abathi ulotshelwe incwadi yisikhulumeli sebandla leCitizens Coalition for Change labanye bakhe abahlanu ukuba sebephelelwe ngumsebenzi.
UMapfume usanda kukhetho ukuba ngumeya weHarare. Abanye okubikwa bexotshiswe licele leCCC elikhokhelwa nguChamisa ngumsekeli kameya wedolobho lakoBulawayo, uMnu. Edwin Ndlovu, usodolobho weMutare uNkosikazi Sophia Gwasira lomsekeli wakhe uMnu. Cloud Nengomasha, kanye loMnu. Stanely Manyenga.
UMapfume loNdlovu bathi kabakaZitholi incwadi ezuveza ukuba sebexotshiswe umsebenzi licele leCCC elikhokhelwa nguChamisa njalo kabakakhulumi ngodaba lolu leziphathamandla zebandla leli.
Bacatshangelwa ukuba badlelana lecele leCCC elikhokhelwa ngozithi ngunobhala jikelele webandla leCCC uMnu. Sengezo Tshabangu olobele incwadi umphathintambo kahulumende obona ngezamadolobho uMnu. Winston Chitando esithi abantu laba lokhu besezikhundleni zabo.
Kasenelisanga ukuxoxa ngodaba lolu loChitando, uChamisa, isikhulumeli seCCC uMnu. Promise Mkhwananzi lomsekeli wakhe uMnu. Gift Ostallos Siziba ngoba bebengaphenduli omakhalekhukhwini. Sixoxe loNdlovu othi laye kuyamethusa okukhulunywa ngabantu.
Siphinde saxoxa ngodaba lolu loMnu. Sengezo Tshabangu othi nguye okumele axotshise abantu kukhansili hatshi omunye umuntu kubandla leCCC.
Forum